.webp){kind=icon}
Регионалниот банкарски систем на Америка е загрозен, а неуспехот на регулаторот да го ажурира и прошири својот режим на осигурување „стави уште еден клинец во неговиот ковчег“, вели Бил Акман, основач на „Першинг сквер“ (Pershing Square).
„Фрст рипаблик“ (First Republic Bank) е втора по големина банка во историјата на САД и четврти регионален заемодавец што пропадна од почетокот на март, по „Силвергејт“ (Silvergate Capital Corporation), „Силикон валеј“ (СВБ) и „Сигначур“ (Signature Bank). „ЏП Морган“ (JPMorgan Chase & Co.) ја купи „Фрст рипаблик“ во понеделникот, победувајќи ги ривалите, вклучувајќи го и ПНЦ (PNC Financial Services Group Inc).
Милијардерот инвеститор смета дека „Фрст рипаблик“ немало да пропадне доколку Федералната корпорација за осигурување депозити (ФДИЦ) привремено ги гарантирала депозитите додека биде создаден нов режим. „Наместо тоа, гледаме како домината паѓаат со големи системски и економски последици“, рече тој.
„Паквест“ (PacWest Bancorp), заемодавецот со седиште во Беверли Хилс, падна за дури 60 отсто по затворањето на пазарот во средата и размислува за деинвестирање или ново задолжување, според луѓе запознаени со плановите.
„Банкарството е игра на доверба. Со ова темпо, ниту една регионална банка не може да преживее лоши вести или лоши податоци, бидејќи неминовно следува пад на цените на акциите, се повлекуваат осигурените и неосигурените депозити, а 'барањето стратегиски алтернативи' значи затворање од ФДИЦ во текот на претстојниот викенд“, вели Акман.
Мајкл Бар, потпретседател за надзор во Федералните резерви (ФЕД), и претседателот на ФДИЦ, Мартин Груенберг, во текот на месецов треба да сведочат на сослушувањата на Комитетот за банкарство во Сенатот во однос на колапсот на американските банки.
Сослушувањата доаѓаат во моменти кога Бар и ФЕД се обидуваат да преправат низа правила што се однесуваат на фирмите со имот од над 100 милијарди долари, вклучувајќи и стрес-тестови и бафери за ликвидност.
Акман во март предложи ФДИЦ да ги гарантира сите депозити на СВБ по нејзиниот колапс, непосредно пред САД да спроведат итни мерки за поддршка на банките. Тој постојано бараше подобрување на програмата за гаранција на депозитите.
Тогаш рече дека тој и „Першинг сквер“ немале директна изложеност на СВБ и дека „колективно, изложеноста на ризичен капитал е помала од 10 проценти од неговиот имот“.
