Маск: Зелената транзиција е скапа, но многу помалку од фосилните горива

Потребна е огромна сума на пари за транзиција кон целосно чиста енергија (околу 10 билиони долари), но долготрајно користење фосилни горива ќе чини уште повеќе, вели Илон Маск.

За да се обезбедат производство на енергија од обновливи извори и доволен капацитет за складирање електрична енергија за напојување на светската економија, ќе биде потребна масовна изградба на фабрики за соларни панели и погони за метал во следните 20 години, посочува директорот на „Тесла“ во својот мастерплан објавен во четвртокот.

Документот ја објаснува визијата на Маск за свет без фосилни горива, претставена на денот на инвеститори минатиот месец, и пресметува дека трошоците за натамошно производство на нафта, јаглен и природен гас по стапките од 2022 година би изнесувало околу 14 билиони долари во следните две децении.

Светскиот енергетски систем, како што го замислува Маск, има потреба од околу 30.000 гигавати енергија од обновливи извори и 240.000 гигават-часа батерии за складирање. Овие бројки се споредуваат со капацитетот на обновливите извори на енергија од 3.214 гигавати во 2021 година и стационарниот сектор за складирање енергија за кој се предвидува дека ќе има капацитет од 1.432 гигават-часа до крајот на 2030 година, според податоците на „Блумберг“. Тоа би било огромен благодат за технолошките фирми што се потпираат на обновливи извори на енергија (како „Тесла“).

Иако инвестициските трошоци од 10 билиони долари во почист свет се високи, Маск тврди дека ова е само дел од глобалната економија од 100 билиони долари и е целосно изводливо кога ќе се распореди во текот на две децении.

Не е еднократен трошок

„Кога ќе се распредели во текот на 20 години, тоа би било 0,5 отсто од глобалната економија“, им кажа тој на инвеститорите минатиот месец. „Значи, ова не е голема сума“.

Секторот за производство на метали би бил подготвен за голем пораст на побарувачката, според сценариото на Маск. Производството на никел, литиум, бакар и други материјали што ќе се користат во батериите и опремата за производство на чиста енергија ќе бара вкупно 502 милијарди долари капитални трошоци за рударство и 662 милијарди долари за рафинирање, предвидува „Тесла“.

„На највисоко ниво, светот ќе мора да ископува 3,3 гигатони земја секоја година за да ги добие металите неопходни за премин кон почисти извори на енергија. Сепак, тоа е многу помалку од 15,5 гигатони што моментално се извлекуваат од индустријата за фосилни горива“, велат од компанијата.

Depositphotos

Исто така, малку е веројатно дека светот ќе остане без резерви од потребните метали, бидејќи е потребен само мал дел од сегашните ресурси, а поголемата побарувачка ќе ги поттикне истражувачите да бараат нови наоѓалишта.

Рециклирањето ќе почне значително да го заменува снабдувањето со нови метали од 2040 година, бидејќи батериите на крајот на работниот век, соларните панели и турбините на ветер се собираат за повторна употреба. Другите материјали ќе бидат отстранети или минимизирани: користење бакар наместо сребро во соларните панели, вештачки графит во батериите и целосно елиминирање на ретките метали од ветерните турбини.

„Одржлива иднина заснована на електрификација е технички изводлива и бара помалку инвестиции и помала експлоатација на материјали отколку продолжување на денешната неодржлива енергетска економија“, се вели во документот на „Тесла“.

Во моментов нема коментари за веста. Биди прв да коментира...

Остави коментар