.webp){kind=icon}
Многу трговци со крипто беа обземени од едно константно прашање додека во изминатите години следеа како цените на токените растат и паѓаат: „Кога 'Ламбо'“?
„Ламбо“, се разбира, е скратеница за „Ламборџини“ (Lamborghini), луксузниот автомобил кој е врвен симбол на успех кога станува збор за богатењето преку дигитални валути и е во фокусот на илјадници „мемови“. Заедно со скапите часовници и другите традиционални симболи за богатство, суперавтомобилите со години имаа свое место во крипто сферата и на инстаграм налозите на крипто инфлуенсерите.
Неодамнешниот пад на цената на криптото ги преплави пазарите за половни производи со други луксузни стоки, вклучувајќи и часовници „Патек Филип“ и „Ролекс“. На „Ламборџини“, меѓутоа му оди сосема добро. Големата побарувачка за суперавтомобили сугерира дека повеќето сопственици се баратели на трофеи, тоа е онаа класа што е толку богата што до неа не допираат промените на пазарот.
Питер Садингтон е еден од нив. Тој стана познат во автомобилската крипто заедница откако во 2017 купи „ламборџини“ за 45 биткоини, што беше еквивалентно на повеќе од 200.000 долари во тоа време. Тој купил биткоини за само 115 долари во 2011, кога криптовалутата вредеше помалку од 3 долари. Овој потег помогна да се популаризира купувањето луксузни автомобили во крипто. Денес, дури и по падот на криптото, 45-те биткоини што тој ги потроши би вределе милион долари.
Садингтон вели дека многу од неговите пријатели во индустријата сè уште се на пазарот за луксузни автомобили. Гоемите поместувања на цените се еднакви за курсот за дигитални валути и не треба да пречат во купувањето на луксузни автомобили, смета Садингтон, сега инвеститор во крипто проекти.
Bloomberg
За време на видео разговорот, Садингтон покажа елегантен, црн „мерцедес“ што го купил во април користејќи пари што ги заработил од копање на биткони. Тој вели дека не планира да го продаде своето оригинално „биткоин ламборџини“: „Тоа е во другата гаража“.
Онлајн платформата „Ауто коин карс“ (AutoCoinCars), основана во 2018 година, која им овозможува на купувачите да набават луксузни автомобили со дигитални пари, забележала двојно зголемена продажба, до 12 милиони долари во изминатата година, стапка која е стабилна, вели главниот оперативен директор, Лук Вилмот.
„Компанијата често регистрира повеќе продажби на луксузни возила за време на пазарни превирања“, додава тој.
Според него, дел од причината е тоа што во овој период автомобилите на „Ламборџини“ ја држат својата вредност подобро од криптовалутите. „Луѓето трошат затоа што сакаат да излезат од крипто зоната и да влезат во физички средства. Тоа ќе им овозможи да располагаат со имот чија вредност не се намалува со темпото на крипто средствата“, објаснува Вилмот.
И навистина, во суровиот пресврт на пазарите, моделите од „Ламборџини“ ја задржаа својата вредност подобро од криптовалутите. Цените на биткоинот и етерот паднаа за повеќе од 50 отсто од ноември, а платформи и заемодавци како „Целзиус“ (Celsius Network) и „Војаџер“ (Voyager Digital) неодамна банкротираа. Во меѓувреме, цената на половно „Ламбо“ е стабилна во текот на целата година, според „Кар гурус“ (CarGurus.com).
Продажбата на „ламборџини“ возила минатата година била поголема од кога било и е со темпо да го надмине тој рекорд годинава, според финансиските извештаи објавени минатата недела.
Дел од причината зошто продажбата се одржа толку добро е тоа што залихите се мали, а листите на чекање се долги. „О'Гара“ (O'Gara Coach Co.), луксузен салон за автомобили во Јужна Калифорнија со опција за купување автомобили во крипто, не забележал никаква промена во продажбата на „ламборџинија“ откако започнаа превирањата на пазарот. Портпаролот вели листата за чекање за овие автомобили е долга година и пол.
Привлечноста која ја чувствуваат шпекулантите со криптовалути е слична на онаа што го тера речиси секој богат човек да троши толку многу на мал автомобил.
„Ако сакате навистина брз автомобил, можете да добиете нешто друго за многу поевтино. Ако набавите јахта, можете да го однесете вашето семејство на одмор“, вели уметникот со псевдоним SHL0MS, кој работи во сферата на незаменливи токени (NFT).
„'Ламборџини' постои чисто за фалење со богатството“, смета уметникот, кој во февруари на камера експлодираше „ламборџини хуракан“ (Lamborghini Huracan) со намера да ја исмее состојбата во крипто индустријата. Резултатот од тоа беше NFT продадено за 2,2 милиони долари.
