.webp){kind=icon}
По строгите ограничувања поради пандемијата, деловните и рекреативните патувања се вратија на голема врата. Затоа, сè почесто се поставува прашањето - со кого е најдобро да се лета?
Судејќи според изборот на Skytrax World Airline Awards 2022 - Qatar Airways е најдобрата авиокомпанија во светот, додека Singapore Airlines и Emirates го заземаат второто и третото место.
Јапонската All Nippon Airways (ANA) и австралиската Qantas Airways се исто така меѓу првите пет светски авиокомпании, што воедно ги потврдува одличните резултати на азиско-пацифичките компании.
На изборот беа доделени и награди за најдобрите авиокомпании по класата на кабини. Најдобра кабина од прва класа според изборот на патниците има Singapore Airlines, додека за најдобра бизнис класа е избран Qatar Airways. Virgin Atlantic Airways ја доби наградата за најдобра премиум економска, а Emirates за најдобра економска кабина.
Во останатите категории, нискобуџетниот превозник Scoot на Singapore Airlines го зазеде првото место за најдобра нискобуџетна авиокомпанија на долги релации. Singapore Airlines доби признание и за најдобар кабински екипаж, а ANA беше наградена за чистота на кабините.
„Qatar Airways беше најголемата авиокомпанија која доследно леташе за време на пандемијата Ковид-19, а нивната мрежа никогаш не падна под 30 дестинации“, посочи извршниот директор на Skytrax, Едвард Плајстед во соопштението за печатот. „Оваа определба очигледно беше добро препознаена од клиентите“, додаде тој.
Наградите на World Airline Awards беа одредени со онлајн анкета на клиенти што траеше од септември 2021 до август 2022 година на англиски, француски, шпански, руски, јапонски и кинески јазик. Повеќе од 350 авиокомпании се најдоа во конечните резултати.
Ова се најдобрите 20 авиокомпании за оваа година:
1. Qatar Airways
2. Singapore Airlines
3. Emirates
4. All Nippon Airways (ANA)
5. Qantas Airways
6. Japan Airlines
7. Türk Hava Yolları (Turkish Airlines)
8. Air France
9. Korean Air
10. Swiss International Air Lines
11. British Airways
12. Etihad Airways
13. China Southern
14. Hainan Airlines
15. Lufthansa
16. Cathay Pacific
17. KLM
18. EVA Air
19. Virgin Atlantic
20. Vistara
