.webp){kind=icon}
Швајцарската банка која западна во проблеми, „Кредит суис“ (Credit Suisse) подготвува докапитализација од 4 милијарди швајцарски франци (4,1 милијарди долари), разделување на своето инвестициско банкарство и укинување на илјадници работни места за да се спаси од колапс.
Со издавање на нови акции за инвеститори, меѓу кои ќе биде и најголемата комерцијална банка во Саудиска Арабија, Saudi National Bank, Credit Suisse планира да го собере споменатиот износ. Исто така, планира да го продаде најголемиот дел од своето портфолио за инвестициско банкарство кое беше фокусирано на хартии од вредност.
Реструктуирањето е дел од забрзаните напори за враќање на кредибилитетот откако големите загуби во инвестицискиот сегмент на бизнисот го нарушија угледот на една од најпрестижните европски банки.
„Новиот Credit Suisse сигурно ќе биде профитабилен од 2024 година. Не сакаме претерано да ветуваме, а потоа недоволно да испорачаме“, изјави главниот извршен директор Улрих Кернер за телевизијата Bloomberg.
Досегашниот шеф на инвестицискиот дел од бизнисот Кристијан Мајснер ја напушта банката.
Во третиот квартал Credit Suisse забележа загуба од 4,03 милијарди франци. Во истиот квартал лани нето добивката изнесуваше 434 милиони франци. Во вториот квартал од годинава загубата изнесуваше 1,59 милијарди франци.
Реструктуирањето до 2024 година би требало да чини околу 2,9 милијарди франци.
Во овој квартал банката ќе почне да го намалува бројот на вработени, и тоа за 2.700 лица. До 2025 година бројот на вработени треба да падне на 43 илјади од сегашните 52 илјади.
Банката има намера да ги намали и оперативните трошоци за 15 отсто.
