.webp){kind=icon}
Новиот сопственик на „Твитер“ (Twitter), Илон Маск, за првпат контактирал со своите работници по електронска пошта доцна во средата за да ги подготви за „тешките времиња што претстојат“ и да ја забрани работата од далечина, освен ако тој лично не ја одобри.
Маск истакнал дека „нема начин како да ја разубави пораката“ за економските изгледи и како тие би влијаеле на компанија која зависи од реклами како што е Twitter, се вели во електронската пошта во која Bloomberg имал увид. Новите правила, кои стапуваат на сила веднаш, бараат вработените да бидат во канцеларија најмалку 40 часа неделно, додава тој.
Прочитајте повеќе: Големите отпуштања ги „издишаа“ Маск и Закерберг
Twitter е под раководство на Маск скоро две недели, а во тој краток период тој отпушти приближно половина од својата работна сила и поголемиот дел од извршниот сектор. Новиот шеф ја подигна цената за претплата на Twitter Blue на осум долари и кон неа придодаде верификација на корисникот. Маск преку мејлот на работниците им порачал дека сака претплатите да сочинуваат половина од приходите на Twitter.
Пред доаѓањето на Маск, Twitter воспостави постојан аранжман за работа од каде било за своите работници, од кои многумина првично работеа од далечина поради пандемијата. Тоа било една од првите теми во заедничкиот разговор на Маск со вработените во Twitter, откако претходно годинава тој го објави договорот за купување на компанијата. Во тоа време рече дека е против работа од далечина и дека ќе прави исклучоци само од случај до случај, како што прави сега.
Исто така, Bloomberg месецов објави дека се елиминирани „деновите за одмор“ од календарот на вработените на Twitter, што беше слободен ден за целата компанија еднаш месечно, воведен за време на пандемијата. Toa даде уште еден знак за нетрпеливоста на Маск кон постоечката работна култура во Twitter.
„Патот пред нас е напорен и ќе бара интензивна работа за успех“, напишал Маск во своето писмо до вработените. Во посебна е-пошта, тој додал дека „во текот на следните неколку дена, апсолутен приоритет е да се најдат и суспендираат сите проверени ботови/тролови и спам налози“.
