.webp){kind=icon}
Германскиот телекомуникациски гигант „Дојче телеком“ (Deutsche Telekom) објави силен раст на профитот и приходите благодарение на посилниот долар и силните резултати во САД.
Нето-добивката на „Дојче телеком“ се зголеми во третиот квартал за 77,5 отсто, на 1,58 милијарда евра. Кога ќе се исклучат посебните ставки, таа е зголемена за 83,6 отсто, на 2,41 милијарди евра.
Приспособената добивка пред камати, даноци и амортизација, без закупнини (EBITDA AL), се зголеми за 8,5 отсто, на 10,5 милијарди евра.
Нето-приходот се зголеми за 8,8 отсто, на 29 милијарди евра. Ако се исклучат промените на курсевите на валутите и во составот на групата, би бил речиси непроменет во однос на истиот период минатата година.
Bloomberg Chartmaker
Во американската филијала вкупниот приход изразен во евра скокнал за 15,9 отсто. Изразено во долари е понизок за еден процент. Во периодот од јули до септември, „Т-мобајл УС“ (T-Mobile US) го зголеми бројот на клиенти за 1,6 милион.
Во Европа, нето-приходот на „Дојче телеком“ е намален за 1,1 отсто, а на домашниот пазар, Германија, е зголемен за 2,8 отсто.
„На резултатите значително влијаеше силната апрецијација на доларот, за околу 17 центи“, се истакнува во извештајот. Со исклучок на трошоците за мобилниот сектор, капиталните трошоци на целата групација се зголемија за 28 отсто, на 5,6 милијарди евра.
Компанијата повторно ги подигна насоките за оваа година и сега очекува приспособена EBITDA AL од повеќе од 37 милијарди евра. Досега прогнозираа дека ќе изнесува околу 37 милијарди евра.
Кога ќе се исклучи ефектот од повлекувањето од бизнисот со изнајмување опрема за терминали во САД, би требало да изнесува повеќе од 35,9 милијарди евра. Досега очекуваа околу 35,9 милијарди евра.
