.webp){kind=icon}
„Мајкрософт“ (Microsoft) е во преговори да инвестира дури 10 милијарди долари во „Опен еј-ај“ (OpenAI), производителот на познатиот четбот со вештачка интелигенција ChatGPT, тврдат извори запознаени со плановите.
Предлогот што се разгледува ќе значи дека софтверскиот гигант со седиште во Редмонд, Вашингтон, ќе ги инвестира тие пари во текот на неколку години, иако конечните услови може да се променат, велат изворите што сакаат да останат анонимни бидејќи и натаму станува збор за приватни преговори. Двете компании со месеци разговараат за договорот, додаваат тие.
„Семафор“ претходно објави дека потенцијалната инвестиција ќе вклучи и други фирми за ризичен капитал и дека „Опен еј-ај“ може да се процени на околу 29 милијарди долари, цитирајќи луѓе запознаени со разговорите. Се додава дека документите испратени до инвеститорите се насочени кон завршување на преговорите на крајот од 2022 година.
Претставниците на „Мајкрософт“ и „Опен еј-ај“ одбија да коментираат.
ChatGPT го „запали“ интернетот од своето лансирање кон крајот на ноември, собирајќи го првиот милион корисници за помалку од една недела. Неговата имитација на човечки разговор поттикна шпекулации за потенцијалот да ги смени професионалните писатели, па дури и да го загрози главниот бизнис за пребарување на „Гугл“ (Google). Организацијата зад ChatGPT, кооснована од Илон Маск и инвеститорот од Силиконската долина, Сем Алтман, заработува пари со тоа што наплаќа од програмерите да ја лиценцираат нејзината технологија.
Прочитајте повеќе: Вештачка интелигенција ги вџаши луѓето со луцидните одговори
Новата технологија е конструирана на јазичниот модел GPT-3 на „Опен еј-ај“ и беше објавена на крајот од годината на голем напредок во вештачката интелигенција. Генераторот на слики на компанијата Dall-E - кој прифаќа пишани упатства за да креира уметност и други слики - исто така поттикна општа дебата за инјектирање на вештачката интелигенција во креативните индустрии. „Опен еј-ај“ веќе работи на наследник, моделот GPT-4, за обработка на природен јазик.
„Мајкрософт“ претходно инвестира околу милијарда долари во „Опен еј-ај“. Исто така, работи на додавање на ChatGPT на својот пребарувач „Бинг“ (Bing), во обид да стекне предност во однос на доминантната понуда за пребарување од „Алфабет“ (Alphabet Inc). Ботот е способен да одговара на прашања на природен и човечки начин, да води разговор и да одговара на дополнителни прашања, за разлика од основниот сет на врски обезбедени преку пребарувањето на „Гугл“.
Сепак, загриженоста за неговата точност, за која самиот Алтман рече дека не е доволно добра за да може да се потпреме на ботот, поттикна претпазливост за неговата прерана употреба, при што училиштата во Њујорк им забранија на своите ученици пристап до ChatGPT.
