.webp){kind=icon}
Додека Илон Маск имаше втор ден на сведочење во Сан Франциско поради својот твит од 2018 година за наводна целосна приватизација на „Тесла“ (Tesla Inc.), неговото богатство се зголеми најмногу во повеќе од два месеца.
Богатството на Маск се зголеми за околу 10,6 милијарди долари, на 145,2 милијарди, откако почна да сведочи, покажува индексот на милијардери на „Блумберг“, што е најголемата добивка во два дена од ноември. Неговата нето-вредност се врати годинава, заедно со мнозинството од 500-те најбогати луѓе во светот, додека пазарите имаат камбек по турбулентната 2022 година.
Маск (51) се соочува со тужба за измама со хартии од вредност што произлегува од неговиот твит во август 2018 година во кој порача дека „размислува целосно да ја приватизира 'Тесла' за 420 долари по акција. Финансирањето е обезбедено“. Инвеститорите забележаа дека неговите тврдења за тоа дека има пари целосно да го приватизира производителот на електрични автомобили претставувале лаги што ги оптовариле со големи загуби пред да биде повлечен планот. Маск тврди дека не постои причинско-последична врска помеѓу неговите твитови и движењето на цената на акциите (акциите на „Тесла“ пораснаа дури за 13,3 отсто на денот на твитот за приватно преземање).
Засега е нејасно кој пат ќе го избере поротата. Маск на саудиски инвеститори во 2018 година им кажал дека не поседува доволно голем удел во „Тесла“ за самиот да ја приватизира, според транскрипт од разговор објавен во судот во понеделникот. Маск тврдеше дека Фондот за јавни инвестиции со седиште во Ријад „недвосмислено сакал да ја приватизира ’Тесла’“ и го обвини Јасир ал-Румајан, гувернерот на државниот фонд на Саудиска Арабија, за повлекување од идејата.
Маск рекол дека тој поседува околу 19 отсто од „Тесла“ во тоа време, а можеби и 25 отсто, доколку искористи некои опции, според транскриптот. Тој сега поседува околу 13 отсто од компанијата, откако продаде речиси 40 милијарди долари од крајот на 2021 година за да плати даноци и да помогне во финансирањето на неговата аквизиција на „Твитер“.
Милијардерот исто така инсистираше на тоа дека само неговите акции во „Спејс екс“ (Space Exploration Technologies Corp.) би ги обезбедиле потребните финансии за да се приватизира „Тесла“. „Спејс екс“ стана клучен дел од неговото богатство - неговиот цврсто зграбен удел од 42 отсто во компанијата вреди околу 49 милијарди долари, според индексот на богатство на „Блумберг“.
Маск, кој го купи „Твитер“ за 54,20 долари по акција, беше прашан за коренот на неговата понуда за цена од 420 долари. Тој рече дека тоа „не е шега“.
Но „има некоја карма околу 420“, додаде тој. „Прашањето е дали тоа е добра или лоша карма во овој момент“.
Маск минатиот месец стана првиот човек што некогаш загубил 200 милијарди долари од својата нето-вредност. Сега, неговото богатство е намалено за околу 195 милијарди долари од највисокиот износ.
