.webp){kind=icon}
Бизнисот на „Шел“ (Shell) со природен гас може да продолжи да расте откако забележа рекорден профит во 2022 година, бидејќи глобалната жед за гориво не покажува знаци на забавување, изјави главниот извршен директор на компанијата Ваел Саван.
По долгогодишните прашања за тоа како производителите на нафта и гас можат да им дадат силен принос на акционерите додека ги намалуваат емисиите на јаглерод, новиот шеф на „Шел“ даде ран увид за тоа како гледа дека војната во Украина ги преобликува и глобалните пазари и можностите за неговата компанија.
„Нашиот бизнис со природен гас продолжува да расте во свет на кој очајно му треба гас во моментот и мислам дека ќе продолжи во таа насока“, рече Саван во интервју за ТВ Блумберг во четвртокот. „Гасот има клучна улога во транзицијата кон енергија со ниска содржина на јаглерод“.
Минатата година бизнисот на „Шел“ со течен природен гас порасна, бидејќи Европа беше принудена брзо да се одвикне од руските резерви. Саван вели дека компанијата испорачала 194 товари ЛНГ во Европа и Обединетото Кралство во 2022 година, околу пет пати повеќе од она што би го направила во вообичаена година.
„Гасот беше апсолутно критичен“, рече Саван. „Долго време клучна област на фокус за нас ќе биде да продолжиме да се занимаваме со намалување на емисиите низ синџирот на вредност“.
„Нема знаци дека ќе се олесни тесниот енергетски пазар што ѝ помогна на компанијата да генерира огромни профити минатата година“, нагласува Саван.
„Она што ќе го имаме во 2023 година е враќање на значителниот кинески апетит за преземање гас откако заврши политиката на нулта ковид“, рече Саван. „Не би прогласил крај на енергетската криза. Мислам дека треба да изминеме уште пат“.
