.webp){kind=icon}
„Рено“ (Renault SA) и „Нисан“ (Nissan Motor Co) потпишаа договор со цел да се намалат долготрајните тензии меѓу двете компании, овозможувајќи им да напредуваат во време на неспоредливи предизвици за автомобилската индустрија.
Како дел од тешко постигнатиот пакт, „Рено“ ќе го намали учеството во „Нисан“ на 15 проценти од 43 отсто, колку што поседува сега, со цел да ги ребалансира несоодветните капитални врски, рекоа денеска партнерите, решавајќи ја причината за непријатности што ја забави соработката во клучно време за производителите на автомобили на глобално ниво. Договорот вклучува и развој и работа на неколку нови модели на глобално ниво.
„Нисан“, пак, има намера да инвестира во бизнисот со електрични возила на „Рено“, „Ампер“ (Ampere), за дури 15 отсто од акциите во ентитетот што е одвоен од работата на „Рено“ со мотори со согорување и погонски единици. Помладиот партнер на алијансата, „Мицубиши“ (Mitsubishi Motors Corp), исто така, ќе размисли за инвестирање во „Ампер“.
Партнерите се согласија и да продолжат да соработуваат за различни индустриски проекти. Конечниот пакт треба да се постигне до крајот на првиот квартал, но со ограничен број услови, вклучувајќи и регулаторни одобренија, се вели во соопштението. Договорот треба да се затвори во четвртиот квартал годинава.
„Индустриските проекти на кои ’Рено’ и ’Нисан’ ќе продолжат да работат заедно може да генерираат стотици милиони евра профит за компаниите со текот на времето, па дури и милијарди ако работите одат многу, многу добро. Релевантноста на овие проекти досега беше потценета“, изјави главниот извршен директор Лука де Мео.
Bloomberg Mercury
Новите потфати вклучуваат развој и изработка на неколку нови модели на производствени локации во Јужна Америка и Индија, како и во Европа, вклучувајќи електрично комбе наречено „флексеван“ (FlexEVan). Во клучната област на „Рено“, партнерите ќе соработуваат и за полнење и рециклирање електрични возила.
Договорот е дизајниран да му даде нов поттик на 24-годишното партнерство, кое речиси пропадна по падот на неговиот поранешен лидер Карлос Гон, во 2018 година. Новиот договор за алијансата ќе биде во сила за почетен период од 15 години.
„Ова е првпат по многу години ’Рено’ и ’Нисан’ да престанат да се борат меѓу себе. Времето ќе покаже што носи преобликуваниот сојуз, но засега ова е навистина добра вест“, вели Пјер-Оливие Есиг, аналитичар во „АИР капитал“ (AIR Capital), пред финализирањето на договорот.
„Рено“, „Нисан“ и помалиот партнер во сојузот „Мицубиши“ ги презентираа деталите од договорот на денешната заедничка прес-конференција во Лондон.
