.webp){kind=icon}
Компанијата сопственик на „Фејсбук“, „Мета“ (Meta Platforms Inc.), доби казна од рекордни 1,2 милијарда евра (1,3 милијарда долари) за прекршување на политиките за приватност на Европската Унија и доби рок да престане да испраќа податоци од своите корисници во САД, откако регулаторите соопштија дека не ги заштитила личните податоци од љубопитните очи на американските служби за безбедност.
Постојаниот пренос на податоци во САД од страна на гигантот за социјални мрежи не ги зема предвид „ризиците за основните права и слободи“ на луѓето чии податоци се пренесени преку Атлантикот, според одлуката на ирската комисија за заштита на податоците, објавена во понеделникот.
Покрај казната, која ја надминува онаа од 746 милиони евра што ЕУ претходно му ја наметна за „Амазон“ (Amazon.com) поради прекршување на приватноста, на „Мета“ ѝ се дадени пет месеци да го прекине секој иден пренос на лични податоци во САД и шест месеци да ја запре незаконската обработка, вклучувајќи го и складирањето на пренесените лични податоци од ЕУ во САД.
Забраната за пренос на податоци за „Мета“ беше широко очекувана и во еден момент ја наведе американската фирма да се закани со целосно повлекување од ЕУ. Но нејзиното влијание сега е придушено од преодната фаза предвидена во одлуката и изгледите за нов договор за протокот на податоци меѓу ЕУ и САД, кој би можел да стапи во сила веќе кон средината на оваа година.
Одлуката објавена во понеделникот е најновата рунда во долготрајната сага што ги стави „Фејсбук“ и илјадници други компании во правен вакуум. Во 2020 година, највисокиот суд на ЕУ го поништи пактот ЕУ - САД со кој се регулираат трансатлантските текови на податоци, поради стравувањата дека податоците на граѓаните не се безбедни кога ќе стигнат до американските сервери. Иако судиите не ја укинаа алтернативната алатка заснована на договорни клаузули, нивните сомнежи за заштитата на податоците во САД брзо доведоа до прелиминарна наредба од ирските власти дека „Фејсбук“ веќе не може да пренесува податоци во САД, ниту со овој втор метод.
Во декември регулаторите на ЕУ претставија предлози за замена на претходниот пакт, под називот „Штит за приватност“ (Privacy Shield), кој беше поништен од Судот на правдата на ЕУ. Тоа следуваше по неколкумесечни преговори со САД, кои доведоа до тоа американскиот претседател Џо Бајден да издаде извршна наредба и САД да ветат дека податоците на граѓаните на ЕУ се безбедни кога ќе бидат испратени преку Атлантикот.
Паричната казна за „Мета“ се совпаѓа со петгодишнината од Општата регулатива за заштита на податоците на ЕУ (GDPR), која нашироко се смета за глобален репер за заштита на приватноста. Од мај 2018 година, регулаторите во 27-члениот блок имаат моќ да наметнуваат казни до четири отсто од годишниот приход на компанијата за најсериозните прекршувања. Ирскиот надзорен орган прекуноќ стана водечки регулатор за приватност за некои од најголемите технолошки компании чии седишта во ЕУ се токму во таа земја, како на пример оние на „Мета“ и „Епл“ (Apple Inc).
