.webp){kind=icon}
Германија има потреба од повеќе странски работници и поефикасни политики за да ги интегрира на пазарот на трудот, доколку земјата сака да го спречи колапсот на нејзините системи за социјално осигурување во иднина, изјави во средата добавувачот на автомобили Continental AG.
„Влијанието на демографските промени, декарбонизацијата и дигитализацијата е огромно“, рече во изјава Аријане Рајнхарт, претставничка одговорна за човечки односи и одржливост. „Нерамнотежата на пазарот на трудот не само што го загрозува општиот животен стандард во Германија. На нашите општествени системи исто така им се заканува колапс“, нагласи таа.
Компанијата Continental која е глобално позната по своите истоимени автомобилски гуми, оваа година има потреба од 2.500 лица квалификуван персонал само во Германија, особено во областа на информатичката технологија и логистиката. Земјата треба да ја олабави бирократијата и да развие концепт за контролирана имиграција на странски работници, како и за преквалификување на барателите на работа во Германија побрзо отколку во минатото, посочи Рајнхарт.
Стареењето на населението и падот на бројот на помлади луѓе кои влегуваат на пазарот на труд значи дека Германија ќе има пет милиони работници помалку до крајот на деценијата, процени во јануари Холгер Шефер, виш економист од економскиот институт IW во Келн. Работната сила ќе се намали за повеќе од 300.000 луѓе само годинава, освен ако имиграцијата не го намали јазот, предвиде тој.
Continental не е единствената германска компанија која бара странски персонал. Недостигот на персонал во авиоиндустријата предизвика аеродромски хаос низ целата земја, токму во периодот на летни одмори, принудувајќи ја владата да подготви правна рамка за да го забрза ангажирањето на персонал за обезбедување од странство, од кои многумина се од Турција.
