.webp){kind=icon}
Да поставите фотоволтаци на кровот во Македонија е макотрпна процедура, целата постапка за собирање дозволи трае половина година, а потоа потребни се уште неколку месеци за да се заврши регистрацијата во Регулаторната комисија за енергетика. Во услови кога цената на струјата за зимските месеци се доближува кон 500 евра за мегават час, бизнисот бара Владата да излезе во пресрет на компаниите кои сакаат да инвестираат во фотоволтаици за сопствени потреби.
„Не можам да ви објаснам колку е фрустрирачки кога ќе ги започнете процедурите за добивање на градежни дозволи, се прашувате дали ќе градите Нуклеарна централа или поставувате лесна фотонапонска централа на кров. Процедурата е најмалку 5-6 месеца за да добиете дозвола за поставување и уште неколку месеца да можете да ја регистрирате во Регулаторна комисија за енергетика“, вели за Блумберг Адриа, Горан Антевски, генерален директор на Раде Кончар – ТЕП.
Тој вели дека бизнис секторот не очекува финансиска помош од Владата, но инсистираат да се најде начин за поефикасно работење на администрацијата во случаите кога се бараат дозволи за поставување на фотоволтачна централа на кров или земјиште за сопствени потреби.
„Би ја замолил Владата доколку размислува правилно да најде начин за суспендирање на дел од законот за градење и енергетика или за донесување на Кризен акт за поставувањето на фотонапонски централи за сопствено користење на енергијата, а комплетирањето на документацијата да биде во рок од 12 или 24 месеца . Со еден ваков кризен акт ќе се забрза процесот на намалување на потрошувачката електрична енергија и намалување на трошоците на компаниите, а со тоа ќе има голема добробит и државата. Ова е вонредна состојба за нашите компании , а Владата со неразумните закони ни го ограничува тековното функционирање. Законот за поставување на фотонапонски центали мора да претрпи промени под итно, во спротивност како компании треба да побараме дел од средствата за високите сметки за електричната енергија да ги покрива Државата доколку не најде слух за промена на нејзините акти“, вели Антевски.
Горан Антевски
Кочо Анѓушев: Секој мегават е чисто злато
И претседателот на Македонската енергетска Асоцијација, Кочо Анѓушев денеска побара Владата да им овозможи на капацитетите од незагадувачката индустрија полесно да поставуваат фотоволтаици затоа што само така бизнисот ќе се одбрани од високите цените на струјата во зимскиот период. Тој денеска барањата на бизнис секторот ги разгледуваше заедно со министерот за економија, Крешник Бектеши и претседателот на Регулаторната комисија за енергетика, Марко Бислимовски.
„Зелената енергија“ повторно да биде номинирана само за индустријата, во текот на зимата да не се затворат границите за увоз на електрична енергија и тоа Владата да го искомуницира со Србија и Бугарија, да се зголеми производството на електрична енергија – ТЕЦ „Неготино“ и „Те-То“ да работат во зима, а мазутот да се пушти на слободен пазар, како и да им се овозможи на капацитетите од лесната незагадувачка индустрија полесно и легално да поставуваат фотоволтаици зашто индустријата ја има само таа можност да се одбрани од ценовниот шок за струјата“, вели Анѓушев и додава „институциите да овозможат 40-ина инсталирани мегавати во фотоволтаици и мали електрани што побрзо да се приклучат на електроенергетскиот систем зашто секој мегават, како што подвлече, е „чисто злато“ и многу значаен за државата“.
„Да се купи мазут побрзо за ТЕЦ „Неготино“ да работи во зима. Но, да се направат и рагозовори со „Те-То“, уште од сега, за и овој капацитет да работи во текот на зимата“, потенцира Анѓушев.
Барањата на бизнис секторот се прифатливи за Владата
Министерот за економија Крешник Бектеши вели дека барањата на компаниите претставени на денешната заедничка средба се прифатливи за Владата. Вети дека тие ќе стапат на сила на 01 август кога повторно ќе биде воведена кризна состојба во енергетскиот сектор.
„Повеќето од мерките, да не кажам 100 отсто, се прифатливи и ќе почнат со спроевдување веднаш, од почетокот на август, со прогласувањето енергетска криза зашто само тогаш Владата ќе може да носи одуки и да му излезе во пресрет на стопанството. Нашите очекувања се дека РЕК „Битола“ од октовмри ќе работи со трите блока, „Осломеј“ ќе рабои со половина капацитет, а почна и испораката на мазут од Грција за ТЕЦ „Неготино“ која најпрво ќе почне со работа со првиот котел, а ќе се направат и сите подготовки за да се стави во функција и вториот котел“, истакна Бектеши.
Министерот уште еднаш ги повика граѓаните да штедат струја.
Вакви повици стигаат до домаќинствата и во европските земји. Европската комисија вчера го усвои планот кој предвидува намалување на потрошувачката на гас за 15 отсто во следните осум месеци. Целта е да се помине зимата што побезболно во услови кога продолжува неизвесноста од испорака на руски гас од кој Европа е многу зависна.
