Фирмата на Маск за мозочни импланти добила дозвола за тестови на луѓе

„Неуралинк“ (Neuralink), компанијата за мозочни импланти на Илон Маск, објави дека добила одобрение од американската Администрација за храна и лекови (ФДА) да спроведе клинички испитувања кај луѓе.

„Ова е резултат на неверојатната работа на тимот на 'Неуралинк', во тесна соработка со ФДА, и е важен прв чекор што еден ден ќе ѝ овозможи на нашата технологија да им помогне на многу луѓе“, објави компанијата во твит од четвртокот.

ФДА и „Неуралинк“ не одговорија веднаш на барањата на „Блумберг“ за коментар.

Стартапот на Маск развива мал уред што ќе го поврзува мозокот со компјутер, а кој се состои од жици поврзани со електроди. Поставувањето на уредот ќе бара дупчење на черепот.

Одобрувањето е „навистина голема работа“, вели Кристин Веле, поранешна функционерка во ФДА и вонредна професорка по неврохирургија и физиологија на Универзитетот во Колорадо. „Тие можат да започнат испитувања на луѓе, што значи дека поминале безбедносно претклиничко тестирање и тестирање на клупа“, рече таа, мислејќи на тестирањето за механички и дизајнерски недостатоци, како и за долговечност и биокомпатибилност.

Основана во 2016 година, „Неуралинк“ привлече некои од врвните невронаучници да работат на нејзиниот мозочен имплант, иако многумина оттогаш се префрлија во други компании или академски кругови. Маск, кој исто така е сопственик на производителот на автомобили „Тесла“ и социјалната мрежа „Твитер“, со години вели дека компанијата е блиску до одобрение од ФДА за испитувања на луѓе.

Уредот на компанијата има цел да им помогне на луѓето со парализа или трауматски повреди на мозокот да комуницираат и да го контролираат компјутерот користејќи ги само своите мисли. На крајот, покрај тоа што им помага на луѓето што се болни, Маск верува дека уредот може да му овозможи на човештвото да држи чекор со напредокот што го прави вештачката интелигенција.

Bloomberg

„Неуралинк“ не е првата компанија со интерфејс мозок-компјутер што влезе во испитувања на луѓе. Полето стана конкурентно откако е основана компанијата. На пример, „Синхрон“ (Synchron) веќе го впиша својот прв пациент во САД на клиничко испитување, ставајќи го имплантот на компанијата на пат до можно регулаторно одобрување за поширока употреба кај луѓе со парализа. Уредот на  „Синхрон“ е помалку инвазивен од „Неуралинк“ и работи користејќи поинаква технологија.

Стартапот на Маск предизвика тревога кај некои групи за правата на животните поради тестирањето на примати. Американското министерство за транспорт започна истрага против компанијата откако група за застапување животни соопшти дека добила е-пошта во која се сугерира дека стартапот не ја следел соодветната процедура при испорака на потенцијално опасни материјали.

И покрај одобрението од ФДА, мозочните импланти уште се далеку од комерцијална примена. Според Веле, уредот на „Неуралинк“ е веројатно најмалку пет до десет години од комерцијализација. Поставувањето на испитувања и регрутирањето пациенти ќе потраат неколку месеци. На „Синхрон“ му требаше речиси една година помеѓу објавувањето дека добил одобрение од ФДА до својот прв пациент во САД и реалното имплантирање на уредот во јули 2022 година. „Вообичаено, првите испитувања кај луѓе вклучуваат од пет до десет пациенти и траат околу шест месеци“, нагласи Веле.

Првата студија на човек ѝ овозможува на компанијата да го приспособи дизајнот на својот уред во зависност од резултатите, без да мора да го рестартира целиот процес на аплицирање во ФДА. „Тоа ви дава флексибилност“, вели Веле.

Ако студијата оди добро, „Неуралинк“ тогаш може да го започне она што е познато како студија за оправданост и на крајот клучна студија, што е приближно аналогно на фаза III во студиите за лекови.

Во моментов нема коментари за веста. Биди прв да коментира...

Остави коментар