.webp){kind=icon}
Повисоките трошоци ги принудија повеќето земји во Адрија регионот да ги зголемат минималните плати, но разликите меѓу земјите се уште се големи. Во 2023 година, словенечката влада ја зголеми нето минималната плата за сто евра, или речиси 13 отсто, на 878 евра нето. „Зголемувањето е неопходно поради поскапите производи за широка потрошувачка и повисоките трошоци“, изјави министерот за труд, семејство и социјална заштита, Лука Месец. Според него, минималната плата во Словенија мора да се прилагоди барем на нивото на растот на цените на стоките за широка потрошувачка.
И во Хрватска од Нова година е зголемена минималната плата, од 500 евра нето на 560 евра нето, што претставува зголемување за 12 отсто. Од 2016 година минималната плата во Хрватска е зголемена за 69,04 отсто. Минатата година околу 35.000 вработени во Хрватска земаа минимална плата, а со новата година ќе ги има уште многу.
Владата на Босна и Херцеговина (БиХ) ја одреди минималната плата за 2023 година на 303 евра, што е за 9,85 отсто повеќе од претходната година. А во Босна и Херцеговина износот на минималната плата повторно се пресметува годишно, земајќи го предвид растот на потрошувачките цени и растот на бруто домашниот производ (БДП) од јануари до септември.
Едно од најголемите зголемувања во регионот забележа Србија, каде минималната нето плата во јануари порасна за 14,3 отсто, на 40.020 динари (340 евра). Ова е досега најголемото зголемување на минималната плата во Србија. Истовремено, српската влада ги послуша работодавците и зголеми одредени бенефиции, па влијанието на повисоката минимална плата за нив ќе се намали со помалите трошоци за придонеси, а ќе се зголемат и даночните ослободувања. Владата на Србија при најавувањето на зголемувањето истакна дека е важно што зголемувањето на минималната плата го надминало зголемувањето на трошоците за живот, што според нив го подига квалитетот на животот во Србија.
Минималната нето плата во Црна Гора на почетокот на новата година остана на 450 евра нето, но треба да се напомене дека оваа земја значително ја зголеми минималната плата на крајот од 2021 година, односно од 250 на 450 евра. Долго време Црна Гора имаше една од најниските минимални плати во светот, па во 2020 година тогашната нова влада одлучи да го промени тоа. Со овој потег сакаа да го намалат и иселувањето на младите.
Минималната плата во Македонија последен пат е зголемена во февруари 2022 година и моментално изнесува 18.000 денари или околу 292 евра нето. Но, Владата најави дека годинава ќе се зголеми на над 20.500 денари или над 330 евра. Согласно законот, повисоката минимална плата ќе стапи на сила во март годинава. Нето минималната плата е слична и во Албанија, каде што владата ја зголеми за шест отсто во септември минатата година, на 290 евра, а според владините проценки, оваа минимална плата ја земаат околу 200.000 работници.
Најниска минимална плата во регионот одамна е во Косово, каде што беше покачена минатата година за прв пат по 11 години. До нова година минималната плата за работниците со над 35 години беше 170 евра, а за помладите 130 евра. Сега е поставена на 250 евра нето. Премиерот Албин Курти при најавата за зголемувањето најави дека стотици илјади работници ќе добијат повисоки плати.
Есента, аналитичарите на „Блумберг Адрија“проценија дека растот на платите во 2023 година првенствено ќе биде поттикнат од недостигот на работна сила - и неквалификувана и висококвалификувана - и претпазливоста на работодавците во однос на отпуштањата. И двете им обезбедуваат на работниците подобра преговарачка позиција за зголемување на платите.
