.webp){kind=icon}
Инфлациските притисоци во економијата на Обединетото Кралство покажаа само ограничени знаци на попуштање во ноември, а компаниите очекуваат покачување на цените за 5,7 отсто во следните 12 месеци.
Главните финансиски аналитичари, анкетирани од централната банка (Bank of England) рекоа дека очекуваат потрошувачките цени на годишно ниво да пораснат за 7,2 отсто и за 3,9 проценти за три години, што е речиси двојно повеќе отколку посакуваните два отсто.
Податоците укажуваат на натамошно зголемување на каматните стапки од страна на централната банка, додека се бори да спречи вкоренување на најголемата инфлација во последните четири децении. Моменталната стапка на инфлација е 11,1 отсто.
Вчера главниот економист на централната банка Хју Пил како причина за внимателност ја наведе моќта на компаниите во одредувањето на цената, заедно со силниот раст на платите.
Очекувањата за раст на цените само незначително се намалени од 6,2 отсто, колку што беа во октомври. Просекот за три месеци до ноември беше 6,2 отсто, што е пад од 6,4 проценти, колку што изнесуваше претходниот месец.
Централната банка ги зголеми каматните стапки веќе осум пати во текот на последната година, на три проценти, во настојување да се спречат платите и цените. Пазарот на пари очекува дека цените на задолжување ќе достигнат 4,7 отсто до летото 2023 година, што е блиску до нивото што преовладуваше пред финансиската криза од 2008 година.
Истражувањето на деловната доверба, кое го спроведе Лојдс банк (Lloyds Bank Plc) претходно во текот на оваа недела, покажа дека 60 проценти од британските компании сметаат дека цените ќе се покачат, при што производителите и увозните компании најверојатно ќе ги зголемат трошоците за своите производи.
