.webp){kind=icon}
Цените на недвижностите во Шпанија забележаа најголем годишен раст од периодот на бум во тој сектор пред глобалната финансиска криза. Тоа е резултат на порастот на побарувачката од купувачите, кои брзаат да избегнат плаќање повисоки каматни стапки.
Цените скокнаа за девет проценти во јануари во однос на претходната година, според месечниот индекс составен од „Фотокаса“ (Fotocasa), веб-страница за недвижности. Тоа е најостриот пораст од септември 2006 година. Најскап град е Сан Себастијан во баскискиот регион, а следуваат Барселона и главниот град Мадрид.
Процентуално движење на цените на недвижностите во Шпанија / Bloomberg Mercury
„Никогаш не сме забележале толку големо зголемување на цената за толку краток временски период. Ова зголемување нè враќа на нивоата од 2006 година, пред балонот со недвижности, кога трошоците за домување претрпеа голем раст“, рече Марија Матос, портпаролка на „Фотокаса“.
Голем дел од скокот се сведува на финансирањето. Шпанскиот хипотекарен пазар има еден од најголемите удели на кредити со променливи каматни стапки во споредба со други во Европа, кои имаат фиксна каматна стапка. Со оглед на тоа што позајмувањето станува поскапо, потенцијалните купувачи брзаат да најдат куќи додека можат да си го дозволат тоа, исто како што понудата на нови згради е намалена поради повисоките трошоци и недостигот од работна сила.
На цените на недвижностите во Шпанија влијае и побарувачката од странство за крајбрежни имоти. Во јануари, регион со најголем раст се Балеарските Острови, чие ценовно зголемување е дури 16,5 проценти. Само за споредба, во регионот на главниот град Мадрид цените се зголемија за девет отсто.
