.webp){kind=icon}
Инфлацијата во еврозоната забави, но со послабо темпо од очекуваното, додека основните ценовни притисоци се искачија на нов рекорд, засилувајќи ги очекувањата дека Европската централна банка (ЕЦБ) ќе мора да ги зголеми трошоците за задолжување.
Поттикната од трошоците за храна и услуги, февруарската главна бројка од 8,5 отсто ја надмина просечната процена од 8,3 отсто посочена во истражувањето на „Блумберг“ меѓу економистите.
Основната инфлација, која во моментот е клучен фокус за креаторите на политиките, се зголеми на 5,6 отсто од 5,3 отсто.
Базичната инфлација во еврозоната постигна рекордно ниво
... вкупната инфлација, пак, забави со послабо темпо од очекуваното
Bloomberg
Бројките следуваат откако неделава беа објавени силните податоци за потрошувачките цени во Германија, Франција и Шпанија, кои веќе ги поттикнаа инвеститорите да се обложат дека стапката на депозити на ЕЦБ, која во моментот е 2,5 отсто, ќе достигне ниво од 4 отсто.
Пазарите на пари ги задржаа облозите за зголемување на стапката за 91 базичен поен до мај, додека еврото беше малку променето во однос на доларот, тргувајќи се за 0,4 отсто пониско, на 1,0625.
Зголемувањето на трошоците за енергија продолжи да се ублажува минатиот месец, откако топлата зима ја олесни кризата предизвикана од војната во Украина. Ефектот ќе стане поизразен во март, бидејќи цените на нафтата и природниот гас се зголемија откако Русија го нападна својот сосед пред нешто повеќе од една година.
Но креаторите на политиката го насочуваат својот фокус на бројката што не зависи од ваквите нестабилни ставки. Тие се загрижени дека зголемениот раст на цените ќе продолжи да проникнува низ економијата и ќе ги наведе работниците да бараат поголеми зголемувања на платите.
Што вели „Блумберг економикс“...
„Покрај мноштвото јастребовски забелешки од креаторите на политиката, сега очекуваме ЕЦБ да продолжи да зголемува до јуни, покачувајќи ја стапката на депозити на 3,5 отсто. Дотогаш базичната инфлација треба да биде цврсто на надолна траекторија. Ризикот е дека лепливата базична инфлација значи дека трошоците за позајмување дополнително ќе се оддалечат на рестриктивна територија во текот на летото“.
- Џејми Раш, главен економист за Европа.
Прочитајте повеќе: Лагард вели дека затегнувањето од ЕЦБ може да продолжи и по март
Сега е сигурно дека ЕЦБ ќе ги зголеми трошоците за задолжување за уште 50 базични поени за две недели. Што ќе се случува надвор од тоа е предмет на интензивна дебата. Претседателката на ЕЦБ, Кристин Лагард, претходно во четвртокот изјави дека покачувањата можеби ќе треба да продолжат, додавајќи дека инфлацијата не е во „стабилен пад“.
