Еден голем победник и многу губитници по спасот на Кредит Суис

УБС излезе како редок победник во кризата предизвикана од Кредит Суис по историскиот договор со посредство на Владата, кој содржи куп финансиски амортизери. По викенд исполнет со избезумени разговори за изнаоѓање решение пред отворањето на пазарите во Азија, фирмата склучи договор за купување на својот помал ривал за околу 3,3 милијарди долари во договор за акции што вклучува обемни гаранции и одредби за ликвидност. Од овој процес излезе еден голем победник и повеќе губитници.

ПОБЕДНИК: Ралф Хамерс

Ралф Хамерс/фотограф Хосе Сарменто Матос/Блумберг

Главниот извршен директор на УБС, Ралф Хамерс очекува богатството и средствата со кои управува банката да се зголемат на околу 5 илјади милијарди долари. Тој доби специјални отстапки за да ја задржи профитабилната швајцарска единица на Кредит Суис за која многу аналитичари рекоа дека вреди повеќе од тројно од она што УБС го плати за целата фирма.

Хамерс и неговиот тим ќе имаат многу да работат додека размислуваат кои бизниси и луѓе да ги задржат, менуваат или отфрлат. Но, тој ќе има на располагање 56 милијарди франци за покривање на сите отписи, како и 9 милијарди франци гаранции од швајцарската Влада за преземање одредени загуби. УБС ќе има пристап и до огромна линија за ликвидност од централната банка.

МНОГУ ГУБИТНИЦИ

Најголемите акционери на Кредит Суис

Повредени се старите и новите инвеститори од Заливот. Инвестицијата на Саудиската национална банка беше неверојатна по својата краткост: заемодавачот загуби 1,1 милијарди франци за помалку од 15 недели од кога го заврши купувањето на својот удел во најновото зголемување на капиталот на Кредит Суис. Саудијците мислеа дека е добра зделка да станат најголем акционер на швајцарската банка пред само неколку месеци. Претседателот на Саудиската национална банка помогна да се разгори паниката оваа недела кога ја отфрли можноста за зголемување на нејзиниот удел во Кредит Суис.

Болката на инвестициската управа на Катар траеше подолг период, бидејќи земјата првпат инвестираше во последната финансиска криза и веројатно изгуби уште поголема сума. Покрај тоа што беше втор најголем сопственик на банката, таа во минатото поседуваше обврзници на фирмата АТ1 кои беа отпишани со купопродажниот договор. Акционерите нема ни да гласаат за овој договор откако Швајцарија ги промени правилата за да го забрза спојувањето.

Улрих Кернер

Урлих Кернер/фотограф Холи Адамс/Блумберг

Главниот извршен директор на Кредит Суис се очекува да замине, бидејќи наследи распаднат заемодавач што не може да го оживее. Улрих Кернер, кој ја презеде челната позиција минатото лето, веќе имаше план за намалување на ризикот по огромниот број скандали и загуби за да се фокусира повеќе на управувањето со средствата. Но, компанијата не беше во можност да се опорави од кризата на доверба која предизвика излез од милијарди долари во октомври. Во последниве денови, притисокот се интензивираше се додека швајцарската Влада не беше принудена да се вклучи.

Мајкл Клајн

Пропадна големиот план на поранешниот шеф на инвестициската банка Ситигруп да го оживее брендот Фрст Бостон и да го изгради во советодавна централа на Вол Стрит. Мајкл Клајн, кој беше избран да го води преструктуриањето ЦСФБ, веќе беше во процес на купопродажба на советодавниот дел на Кредит Суис за сума од околу 210 милиони долари кога богатството на банката ненадејно се распадна во изминативе недели. Иако претседателот на УБС, Колм Келехер, не се обрати директно на ЦСФБ на прес-конференција доцна во неделата, тој сепак посочи дека фирмата е задоволна со сопствената инвестициска банка и планира значително да го намали ризикот на Кредит Суис.

АТ1 обврзници

Инвеститорите во обврзници обично се подобро заштитени од загуби отколку акционерите, но не во овој случај. Швајцарскиот регулатор ќе наметне давачки за долг од 17 милијарди долари со висок ризик, познати како обврзници за дополнителни нивоа за да избегне даночните обврзници да ја поднесат сметката за колапс на банката. Вкупниот отпис е во износ од 275 милијарди долари, што е најголема загуба досега за европскиот АТ1 пазар. Акционерите, кои вообичаено се први на удар во сценариото за отпишување, добија барем мала надокнада.

Швајцарски регулатори

Финма стана првиот регулатор кој прв пат од финансиската криза мораше да спасува банка која се смета за системски важна. Швајцарската Влада мораше да се вклучи во обезбедувањето милијарди франци како гаранции за УБС, а централната банка беше принудена да обезбеди големи резерви на ликвидност за да го олесни спасувањето, ставајќи ги даночните обврзници во ризик наредните 15 години по спасот на УБС. Швајцарската министерка за финансии Карин Келер-Сатер призна дека тоа е единствениот начин да се стабилизираат меѓународните финансиски пазари.

 

Во моментов нема коментари за веста. Биди прв да коментира...

Остави коментар