.webp){kind=icon}
Продажбата на автомобили во Европа се зголеми седми месец по ред, потпомогната главно од силниот раст во Велика Британија и Шпанија и подобрувањето на синџирите на снабдување.
Регистрациите се за 12 проценти поголеми во февруари, а бројот е 902.775 возила, објави денеска Европската асоцијација на производители на автомобили. Продажбата на електрични возила со батерии се зголеми за 34 проценти, што е раст поголем од кој било друг тип на погонско возило.
Недостигот од полупроводници и други компоненти станува сè помал проблем, но производителите на автомобили сè уште се борат со логистичките проблеми, забавувањето на економиите и инфлацијата. Книгите за нарачки засега остануваат полни, но производителите на автомобили стануваат сè попесимисти во врска со изгледите, покажа истражувањето на германските производители објавено претходно овој месец.
„Ограничувањата на синџирот на снабдување се намалија, иако затегнувањето на потрошувачките буџети во услови на инфлација и зголемувањето на каматните стапки се ризик за цените и закрепнувањето на продажбата на автомобили“, напишаа аналитичарите на „Блумберг интелиџенс“ (Bloomberg Intelligence), Џилијан Дејвис и Мајкл Дин, во нивниот извештај објавен вчера. Тие очекуваат продажбата да се зголеми за најмалку пет проценти оваа година.
Број на регистрации на нови возила / Bloomberg Mercury
Добивките од минатиот месец беа особено изразени во Велика Британија и Шпанија, каде што продажбата се зголеми за 26, односно за 19 проценти. Регистрациите во Германија пораснаа за 2,8 отсто, закрепнувајќи од падот во јануари.
„Во Обединетото Кралство побарувачката на возниот парк е сосема во ред, дури и кога малопродажбата е силно погодена од кризата на трошоците за живот“, рече во интервју Гијом Сикард, раководител на „Рено“ (Renault SA) во Обединетото Кралство. Загриженоста за повисоките трошоци ја зголемува привлечноста на беспрекорните автомобили „дачија“ (Dacia) на „Рено“, истовремено дозволувајќи му на брендот да се фокусира на своите најпрофитабилни модели.
Број на продадени автомобили според производител / Bloomberg Mercury
Францускиот производител го предводеше растот меѓу големите европски производители на автомобили, со 29 отсто зголемување во февруари, а најмногу благодарение токму на „дачија“, чии испораки пораснаа дури за 54 проценти.
Во земјите на Европската Унија целосно електричните возила се зголемија за повеќе од 12 проценти на месечно, односно за 9,7 отсто на годишно ниво. Иако „модел ипсилон“ (Model Y) на „Тесла“ (Tesla Inc) беше најпродаваното електрично возило минатата година, „Фолксваген“ (Volkswagen AG) и „Стелантис“ (Stellantis NV) се подготвуваат во наредните месеци да претстават неколку модели возила на батерии.
