.webp){kind=icon}
Интервенција на пазарот на електрична енергија може да ги намали цените, но нема да ја заштити Европската Унија (ЕУ) од фактот дека има сериозен недостиг од енергија, заклучи Европската Комисија (ЕК).
ЕУ токму во моментов работи на мерките што би требало да ги намалат високите цени на електричната енергија. ЕК го разгледува пакетот мерки кои што би опфатиле намалување на потрошувачката и ограничување на максималното ниво на цената на струјата произведена од обновливи извори, нуклерни централи и таа од електраните на јаглен.
„Интервенциските мерки може да помогнат да се ублажи ефектот од енергетската криза, посебно кога станува збор за одредени категории потрошувачи, но не може да се вратат цените на ниво од пред кризата. Во овој момент не гледаме никаков начин за интервенција со кој што би можело тоа да се постигне во краток рок“, се наведува во документот на ЕК во кој што Блумберг имаше увид.
Последните денови паднаа цените на природниот гас и на струјата, но и натаму се на ниво значајно повисоко од вообичаеното за овој период од годината.
Ограничување на приходите
Во својот нацрт предлог, ЕК смета дека цените на електричната енергија најдобро ќе се одржат со комбинација од три мерки: намалување на потрошувачката, одредување на горна граница на цената од произведувачите, чии трошоци се пониски од производството од природен гас. И третата мерка е користење на дел од високите приходи на производителите на електрична енергија за ублажување на негативните ефекти за потрошувачите од кризата.
Ограничувањето на приходите на производителите на електрична енергија би обезбедило дополнителни пари во државните буџети, што ќе се пренаменат и искористат за да се намалат сметките на потрошувачите, без разлика дали тоа ќе биде преку регулирање на цените, преку директна поддршка или преку намалување на данокот.
ЕК ќе разговара за овие детали со експертите на состанокот, пто треба да се одржи на 7 септември.
„Ова сигурно нема да ги врати цените на ниво од пред две или три години, но пренамената на дел од профитите на производителите на електрична енергија би требало да им овозможат на владите во значајна мера да ги субвенционираат трошоците за електрична енергија на домаќинствата и компаниите“, изјави Ханс Кониг од компанијата Aurora Energy Research, што се занимава со енергетска аналитика.
