.webp){kind=icon}
Француската влада драстично ги зголеми плановите за заштеди на потрошувачката на струја зимава за да се избегне прекин во напојувањето, но и за да влијае на свеста на јавноста.
Премиерката Елизабет Борн ги повика домаќинствата, компаниите како и локалните и националните власти да ја намалат потрошувачката на струја за 10 отсто во споредба со минатата година. Администрацијата на претседателот Макрон претходно побара истата цел да биде исполнета за две години.
Планот е многу абициозен, во 2020 година која беше одбележана со пандемијата и карантините, вкупната потрошувачка на крајните корисници падна за 5,6 отсто, покажуваат податоците на француското министерство за екологија.
Франција предвиде милијарди евра од буџетот за да го ограничи растот на цените на струјата и гасот и да им помогне на сиромашните домаќинства да си ги платат сметките.
Но, иако мерките финансирани од буџетот донесоа извесно олеснување за потрошувачите и помогнаа да се заузда инфлацијата во споредба со другите земји од регионот, владата предупреди дека потрошувачката мора да се намали за да се избегнат исклучувања на струјата.
Во средата од националниот оператор на електроенергетската мрежа, Reseau de Transport d’Electricite изјавија дека зимава можеби ќе мора да се издаваат предупредувања за домаќинствата, претпријатијата и локалните власти ја намалат потрошувачката. Тоа се случи ден по изјавата на министерката за енергија Agnes Pannier-Runacher која рече дека не постои ризик од недостиг на струја кој би резултирал со колапс на францускиот електроенергетски систем, но дека во случај на недостиг на струја би можело да дојде до организирано намалување на оптоварувањето во зависност од временските прилики.
