.webp){kind=icon}
Во рекорден минус е индексот на доверба на македонските потрошувачи, кој илустрира колкав е степенот на оптимизам за состојбата на економијата што граѓаните го изразуваат преку нивните активности на штедење и трошење. Истражувањето што редовно го спроведува Европската комисија во земјите членки на Европската Унија и земјите-кандидати за зачленување покажува дека индексот на довербата на потрошувачите во Македонија во јули, годинава бил од -41,8 проценти, што е најниско ниво во изминативе 10 години. Иако во август има благо зголемување, индексот се уште е многу под повеќегодишниот просек.
Според овој индикатор, Македонците се најпесимисти во Европа. Имено, месечното движењето на индексот на доверба на потрошувачите во Македонија во периодот август 2021-август 2022 е постојано во минус поголем отколку земјите во регионот и европскиот просек.
Што се мери?
Истражувањето за индексот за доверба на потрошувачите го опипува мислењето на населението за економските текови во земјата. Избран примерок испитаници од секоја земја во анкета одговараат на прашања за актуелната финансиската состојба на домаќинствата и очекувања за идниот период, даваат нивно мислење за општата економска состојба во земјата и прогнози за наредните месеци, како и за движењето на цените на производите за широка потрошувачка, движењето на невработеноста, штедењето, можноста да одвојат повеќе пари за капитални тропоци како што се купувањето мебел и апарати за домаќинството и слично.
Станува збор за сет од дванаесет прашања на кои се нудат повеќе опции за одговори кои потоа се сублимираат. Индексните бројки илустрираат сезонски прилагодени салда, дефинирани како разлика (во процентни поени од вкупните одговори) помеѓу позитивните и негативните одговори.
Преовладува песимизмот
Од одговорите на одделните прашања може да се забележи дека македонските граѓани во текот на летните месеци го допреле дното во однос на финансиската состојба на нивните домаќинства.
Ништо подобри не се резултатите и кај очекувањата за финансиската состојба во наредните дванаесет месеци. Иако во август има благо зголемување на довербата во однос на овој индикатор, таа е се уште многу пониска отколку во претходните дванесет месеци.
Истражувањето покажува дека граѓаните силно ги почувствувале ефектите од инфлацијата со оглед на тоа што најголем дел од нив укажале на висок пораст на цените на производите за широка потрошувачка.
Слична е и состојбата кај очекувањата за движењето на цените. Очигледно е дека тие уште во последните месеци од минатата година прогнозирале раст на цените на производите за широка потрошувачка. Високата споредбена основа од изминатиот период најверојатно придонела кон мислењето за поумерен раст на цените во текот на летните месеци.
Во минус е индикаторот кој го отсликува мислењето на граѓаните дали е вистински момент за капитални трошоци на домаќинството како што се купувањето мебел и апарати за домот.
Иако во август годинава има благо подобрување, очигледно е дека има голем песимизам меѓу граѓаните и околу можностите да се заштедат пари.
Еден од најважните показатели кои придонесуваат кон формирањето на индексот на доверба на потрошувачите е мислењето на граѓаните за економската состојба во земјата. Резултатите од анкетата покажуваат дека граѓаните во изминативе дванесет месеци биле песимисти за македонската економија.
Слична е состојбата и со очекувањата за движењето на македонската економија, каде што преовладува песимизмот.
