.webp){kind=icon}
Финансискиот систем во земјава е стабилен и покрај продолжената ескалација на геополитичките тензии создадени со воената инвазија на Русија врз Украина, како и глобалните предизвици поврзани со енергетската криза и високите стапки на инфлација, оценува Комитетот за финансиска стабилност, што денеска на седница ги разгледа најновите движења во финансискиот сектор.
Сепак, во услови на зголемена неизвесност уште повеќе е нагласена потребата за темелна процена на ризиците, соодветно управување со ризиците и натамошно градење капитал заради обезбедување поголем капацитет на финансиските институции за апсорпција на ризици.
На седницата е посочено дека геополитичките тензии го влошуваат глобалниот амбиент, неповолно делуваат на економските изгледи и создаваат дополнителни притисоци врз цените на светските пазари на примарни производи и врз инфлацијата поради што потребна е зголемена претпазливост при водењето на политиките и јакнење на добрите политики за управување со ризиците.
Гувернерката на Народната банка, Анита Ангеловска-Бежоска истакна дека заклучно со 30 септември капитализираноста и ликвидноста на банкарскиот систем се на соодветно ниво и дека нефункционалните кредити се задржале на историски ниско ниво.
„На 30.9.2022 година, стапката на адекватност на капиталот се зголеми за 0,4 процентни поени до нивото од 17,7 проценти, што претставува максимална вредност забележана во изминатите десет години. Банкарскиот систем традиционално одржува солиден обем на ликвидни средства, коишто му овозможуваат висока отпорност на шокови, но и капацитет за натамошна кредитна поддршка на реалниот сектор. Сепак, со оглед на ризиците од окружувањето, неопходна е зголемена претпазливост на политиките и јакнење на добрите практики за управувањето со ризиците од страна на банките“, нагласи Ангеловска-Бежоска.
Министерот за финансии Фатмир Бесими посочи дека постојано се следи работењето на финансиските и друштвата за лизинг.
„Нивното учество во финансискиот систем сè уште е мало, сепак зголемувањето на активата во секторот финансиски друштва за 27,9 проценти и друштвата за лизинг за 15,4 проценти укажува дека овие друштва имаат постојан раст во финансискиот сектор во земјава, а со тоа потребно е уште повнимателно следење на состојбите во нив“, рече Бесими.
Тој додаде дека за зајакнување на регулаторната рамка за работење на финансиските друштва на пазарот и за зголемување на довербата кај населението се подготвени измени и дополнувања на Законот за финансиските друштва, којшто е во владина процедура и се очекува дека ќе биде донесен во Собранието на почетокот на следната година.
Според претседателката на Комисијата за хартии од вредност, Нора Алити, и покрај намалените показатели на пазарот на хартии од вредност, споредбено со минатата година, овој сектор е стабилен, без поголеми ценовни осцилации.
„Со целокупното работење, КХВ како проактивен регулатор придонесува за почитување на признатите норми на супервизија и надзор заради одржување сигурен и транспарентен пазар и зајакнување на довербата кај инвеститорите. Истовремено, поттикнавме издавање нови инструменти на пазарот на хартии од вредност, со што им одговоривме на барањата на инвеститорската јавност за диверзификација на ризикот од инвестирањето“, нагласи Алити.
Претседателот на Агенцијата за супервизија на капитално финансирано пензиско осигурување ‒ МАПАС, Максуд Али истакна дека инвестициските циклуси се анализираат и се проценуваат преку активностите за следење на приносот и ризикот, поттикнувањето промена на прописите, процената на можностите за инвестирање и истовремено за преиспитување на ризиците воспоставени во супервизијата врз основа на оцена на ризици.
„Супервизијата врз основа на оцена на ризици што ја спроведува МАПАС ги следи квалитативните и квантитативните параметри на инструментите во кои се инвестираат средствата на пензиските фондови, диверзификацијата на инструментите, изложеноста по класи на средства, како и начинот на управување со ризиците од страна на пензиските друштва. Имајќи предвид дека пензиското штедење е штедење на долг рок и најголемиот дел од членовите во пензиските фондови во просек се млади, очекувањата и проценките се дека и оваа криза, како и претходните, е само еден периодичен циклус од долгорочниот период на инвестирање на средствата на пензиските фондови“, истакна Али.
Претседателот на Советот на експерти на Агенцијата за супервизија на осигурувањето (АСО), Крсте Шајноски, во своето излагање нагласи дека во трите квартали од годинава продолжува растот на осигурувањата во двете групи, неживот и живот.
„Конзервативните политики и регулативата за вреднување на техничките резерви и вложувањата на средствата коишто ги покриваат техничките резерви, како и високиот квалитет на инструментите коишто се вклучени во пресметката на капиталот на друштвата на осигурување, се добра основа и гаранција за зачувување на солвентноста во работењето на друштвата. Вкупната актива на шеснаесетте друштва за осигурување на 30.9.2022 година за првпат во историјата го надмина прагот од 500 милиони евра. Повеќе од 2/3 од вкупната актива се високо ликвидни финансиски инструменти, од кои над 200 милиони евра се вложувањата во државни хартии од вредност“, вели Шајноски.
На седницата било истакнато дека сите финансиски регулатори ќе продолжат со натамошно координирано следење на состојбите и навремена размена на сите релевантни информации и дека се подготвени да реагираат соодветно на случувањата, секој во рамките на надлежностите на својот мандат. Утврдено е дека сите регулатори на финансискиот систем имаат доволно инструменти што може да ги користат доколку е неопходно, со што се гарантира дека финансиската стабилност ќе биде задржана и во следниот период.
