.webp){kind=icon}
Парите многу ја загубија вредноста со инфлацијата и нема основа по која ќе растат во наредниот период, смета Раде Ненадиќ, директор на агенцијата за привремени вработувања „Партнер“.
„Мислам дека во наредниот период не можеме да очекуваме некое позначајно или, јас би рекол, можеби и никакво зголемување на платите, без оглед на тоа што, според мене, тие се намалени со инфлацијата за многу повеќе од два отсто. Тоа го чувствуваат сите граѓани и се однесува пред сè на цените на храната, како основен производ и основна потреба на граѓаните. Еве, сега имаме најави за поскапување на струјата од Нова година, парното греење итн. Од друга страна, имаме пад на индустриското производство и на бројот на работници во индустриското производство. Така што не гледам врз основа на што би се зголемиле платите, кои објективно се на многу ниско ниво и меѓу најниските во регионот“, вели Ненадиќ.
Тој во разговор за Блумберг Адрија ТВ вели дека не гледа ниту како расте просечната плата.
„Ние имаме една интересна статистика. Кај нас просекот на платите секој месец се зголемува. Барем, мене искрено никако не ми е јасно, а и на други мои колеги и соработници од стопанството, на што се должи тој пораст на платите на месечно ниво што го објавува Статистика. Платите растат, но не знаеме каде, немаме увид во структурата на платите“, вели Раде Ненадиќ.
Според неговото искуство како професионалец во посредувањето на пазарот на трудот, вели дека има голема противречност меѓу понудата и побарувачката на профилите работници на пазарот.
„Кај нас тешко може да се каже дека воопшто имаме пазар на трудот споредено со развиените европски држави. Ни недостига буквално сè од она што се вика квалификувана работна сила, од градежништво, преработувачка индустрија, производствени погони, недостигаат заварувачи, месари, работници во прехранбената индустрија, значи сето тоа што се вика квалификувана работна сила, која е подготвена веднаш да се вклучи во процесот на производство“, вели Ненадиќ.
Според него, иако имаме доста стручни средни училишта, квалитетот на учениците што излегуваат оттаму е дискутабилен затоа што немаат соодветна практика.
„Учат само теорија, а компаниите сакаат готови обучени работници што можат веднаш да започнат со работа. Имаме некој, би го нарекол, експеримент со дуалното образование, меѓутоа мислам дека тоа нема да ја смени сликата и да ја подобри состојбата. Потребен е целосно нов концепт на образовниот систем, потребна е анализа кои кадри ги имаме премногу, а се невработени или работат нешто друго од она за што се образовале, а кои кадри недостигаат. И сега доаѓаме до прашањето како да ги привлечеме младите кон тие струки што недостигаат. И сега пак се враќаме до првото прашање за платата. Младите однапред бараат високи плати за да почнат да работат, а нудат многу малку за возврат, односно немаат искуство. Работодавците, нормално, не се подготвени да ги платат толку за да ги обучуваат понатаму во наредните неколку месеци или една година. И тука доаѓаме до еден парадокс, од една страна имаме незаинтересираност на младите поради платите, а од друга страна немаме квалитетен кадар што го продуцира образованието“, вели Ненадиќ.
Раде Ненадиќ зборува и за тоа како да се реши тој парадокс на пазарот на трудот. Целиот разговор погледнете го во видеото.
