.webp){kind=icon}
Последиците од пандемијата на ковид-19 не ги спречија македонските компании од областа на индустријата да инвестираат и да го зголемат производството во текот на минатата година. Всушност, македонската индустрија оствари рекорди во неколку параметри, што секако создава основа полесно да се преброди актуeлната криза предизвикана од високите цени на енергентите и рекордната инфлација.
Најголеми инвестиции и извоз
Според податоците на Државниот завод за статистика, во индустријата лани биле пласирани инвестиции во вредност од околу 35 милијарди денари, односно 570 милиони евра, што e рекордна сума од 2016 година наваму.
Лани бил остварен извоз на индустриски производи во износ од 402 милијарди денари, или околу 6,5 милијарди евра, што е убедливо најголема вредност во периодот 2016-2021 година. Истовремено, рекорден раст има и на увозот на индустриските производи.
Каде има раст, а каде пад на производството?
Шаренолика е палетата на индустриското производство во Македонија. На листата може да се најдат руди, метали, различни производи од прехранбената и текстилната индустрија, пијалаци, лекови, машини, делови за автомобили и за автобуси и што уште не.
Во минатата година има зголемување на производството кај повеќе видови производи. Во секторот вадење руди и камен, кај лигнитот лани има зголемување на производството, односно на ископот, на 4,7 милиони тони наспроти 4,5 милиони тони остварени во 2020 година. Зголемување има и кај производството на мермер од 75.181 тон во 2020 година на 90.163 тони во 2021 година. Во овој сектор пад може да се забележи на производството кај гранитот, варовникот и гипсот и песокот.
Раст на производството има речиси кај сите прехранбени производи, освен кај млечните производи и лебот, кои бележат благ пад во 2021 година во однос на претходната година.
Позитивни трендови има и кај производството на пијалаци, односно раст на производството на жестоки пијалаци, минерална вода, пиво и вино.
Кога станува збор за додадената вредност, забележително е што лани имало пораст на производството на вино во шишиња, а намалување на производството на вино на точење, што секако е позитивно за македонските винарници.
