.webp){kind=icon}
Во согласност со најновите податоци објавени од Народната банка, кои се однесуваат на безготовински трансакции на виртуелни места (е-продавници), за првите девет месеци од минатата година вкупната вредност на онлајн трансакции реализирани во земјава и странство, со домашни и странски картички, изнесува 411 милиони евра, посочи Виктор Стојкоски, генерален секретар на Асоцијацијата за е-трговија, во гостувањето на Блумберг Адрија ТВ.
„Тоа претставува пораст од 28,2 отсто во споредба со истиот период минатата година, кога се остварила вредност од 320 милиони евра“, нагласи тој.
Според него, граѓаните сè повеќе купуваат и веруваат во е-трговијата, односно на овој начин набавуваат добра и услуги и од поголема вредност.
Во гостувањето Стојкоски посочи дека е-трговците во нашата држава како главни предизвици ги наведуваат нелојалната конкуренција, сивата економија, наоѓањето соодветен кадар, а како нов предизвик се посочува и одржувањето на цените на ниво како во претходните години.
„Последново веројатно е резултат и на инфлацијата, предизвикана од економската криза, под влијание на претходната здравствена ковид-криза, а сега и воената криза“, истакна тој.
Целиот разговор со него погледнете го во видеото во рамките на објавата.
