По нашите анализи и очекувања, мислиме дека во 2023-та во Македонија ќе дојде до стабилизација на цената на становите, изјави Андреа Серафимовски, претседател на Здружението на градежници при Стопанската комора, во гостувањето на Блумберг Адрија ТВ.
„Би требало годинава да имаме цена што ќе биде стандардна и која ќе ги одразува трошоците за градба, ќе ги одразува предвидените профити на компаниите и моменталните можности на купувачите“, нагласи Серафимовски.
Како што посочи тој, очекувањата се побарувачката, која е огромна во моментов и која веќе трета или четврта година е на многу висока стапка, да почне да опаѓа, со оглед на тоа дека понудата на пазарот би се зголемила по долги години, особено во оние области со голема побарувачка и голема трансакциска активност.
Со оглед на тоа што има стабилизација кај основните материјали за градба, но тоа уште не се прелева и на крајните цени, запрашан кога точно може да се очекува ладење на пазарот, Серафимовски одговори: „На оние места каде што има голема побарувачка не може да очекуваме намалување на цените сè додека не видиме дека понудата е поголема од побарувачката. Имено, иако во моментов има стабилизација на цените на материјалите, тоа е стабилизација во однос на она кога минатата година имавме енормни скокови од месец на месец. Сега кај околу 50 отсто од производите гледаме стагнација и стабилизирање на цените, што не значи дека се стабилизирани сите цени“.
Toj нагласува дека има и зголемени трошоци за комуналии, кои, како што вели, се покачени дури за 50 отсто, а тука се и трошоците за градежно земјиште, кое го има сè помалку.
„Сепак, сметаме дека би дошло до една стабилизација кон крајот на годината, со оглед на тоа што во моментов ги знаеме проектите што почнуваат, знаеме со кои понуди би се соочиле побарувачите. Доколку се водиме според податоците од Народната банка и растот од 20,6 отсто што го имавме кон крајот на 2022-та, очекуваме дека тој раст од минатата година би се намалил за двојно годинава“, посочи Серафимовски.
Целиот разговор со него погледнете го во видеото во рамките на објавата.