„Зум ин“: Рано е да се каже дека инфлацијата го достигна врвот

Иако има знаци на забавување на инфлацијата, рано е да се каже дека таа го достигна својот врв, вели Маја Стевкова Штериева, претседателка на Македонската банкарска асоцијација, во разговор за „Зум ин“ на „Блумберг Адрија ТВ“. Според неа, нивото на неизвесност сè уште е многу големо и со тоа што се презема, не може да се потврди дека инфлацијата е под контрола и дека нема да има потреба од натамошно зголемување на каматните стапки.

Штериева додава дека банкарскиот сектор во Македонија е стабилен, банките се многу подобро контролирани за разлика од пропаднатите банки и довербата во банкарскиот систем не може да се доведе во прашање. Депозитите надминуваат пет милијарди евра и бележат континуиран раст, особено кај населението, кое е најподложно на вакви вести.

Универзитетскиот професор Марјан Петрески, пак, зборувајќи за најавата за увоз на работна сила, рече дека ако носителите на политиките имаат за цел зголемување на платата, не може прв одговор да биде увоз на работна сила без да се направат поробусни напори за преквалификација и доквалификација на луѓето што се невработени, со цел да се исцрпат и други мерки што стојат на располагање, па дури потоа да се пристапи кон вакво размислување.

Во однос на замрзнувањето на цените, Петрески смета дека како мерка се коси со принципите на пазарната економија, но сепак за дел од замрзнувањата може да се најде некакво оправдување. Тој смета дека Владата влегува во некаков јуриш да нарави фиксирање на цените на повеќе производи, а неадекватната процена на точката до која може да се оди во таа насока ќе доведе до неуспех на мерката.