.webp){kind=icon}
Неразумно е да може една пратка побрзо да стигне од Кина отколку од БиХ или Србија, вели во интервју за „Блумберг Адрија“, Игор Гешовски, главен извршен директор на „Еко логистик сервис“, коментирајќи ги состојбите во индустријата за курирски, експресни и пакетни услуги (КЕП).
„Морам да кажам дека во Македонија работите, за жал, сè уште не се стабилни, секоја година по неколку компании исчезнуваат. Не успеавме да се наметнеме со одредени системи бидејќи иднината во овој бизнис се развојот и технологијата. Македонија има најниски цени на услугите во регионот. Одиме напред, но многу е бавно, бидејќи овој сектор не е помогнат од ниту една институција и сè уште мислам дека немаат сенс дека работите се менуваат. Итно мора да се воведе ’Пејпал’ (PayPal), да отвориме коридори за брза размена, за да можеме сериозно да влијаеме во овој сегмент и да одиме чекор напред, како и во другите европски држави“, вели Гешовски.
Тој истакнува дека Владата нема слух за потребите на компаниите од аспект на подобрување на состојбите во поштенската индустрија. За поевтина и побрза услуга, според Гешовски, клучно е и отворање коридори за брза размена во регионот.
„И цените за кои ги разменуваме стоките се неверојатно големи, истата цена како за Германија или Англија е за Србија и Македонија. Тоа е сериозно прашање не само до нас, туку пред сè до сите наши влади. Многу често се собираат на добри коктели и саеми за вино итн., а никој нема осет дека треба да седнеме и да поразговараме како да го надминеме тоа, бидејќи, сепак, порано сме биле во една држава, тоа го кажувам поради блиските односи, стандарди, регулативи и личните контакти што, сепак, е една голема предност. За жал, никој нема осет за тоа и мислам дека нашите политичари живеат во некое друго време, не се свесни за поддршката и исчекорот што треба да го направат, а со тоа ќе им помогнат на малите бизниси пред сè. Второ, регионот има многу силна дијаспора, која е важен фактор, бидејќи поврзувањето со нашата дијаспора ќе донесе можност за одредени наши производи или документи или што било да стигнат поевтино, побрзо и поквалитетно кај нив“, вели Гешовски.
