.webp){kind=icon}
Светот се соочува со највисоката инфлација во последните четириесетина години. Руската инвазија во Украина предизвика недостиг на гориво и храна. И токму тие се двигатели на инфлацијата на глобално ниво. Според вчерашните податоци, во еврозоната во јули таа стигна до рекордни 8,9 отсто.
Во вакви услови граѓаните штедат на се што може, а сега на ред дојде и храната. На почетокот на овој месец државната статистика во Велика Британија објави дека над 22.000 артикли во четири најголеми трговски ланци поскапеле, што ги тера потрошувачите да штедат и на храната.
Кај нас, инфлацијата заклучно со јуни изнесуваше 14,5 отсто и е највисока во последните триесетина години.
Според државната статистика во земјава, во период од една година најмногу растеле цените на прехранбените производи, а највисок раст има кај цената на лебот. За една година таа се зголемила за 30 отсто.
Во вакви услови, инфлацијата ги „изеде“ и платите кои на хартија растат, па затоа статистиката покажува дека се намалува прометот во трговијата со храна – што значи дека Македонците штедат и на јадењето. Трендот на намалување на прометот со храна почнал пред Нова година, и се уште трае, а најмногу се штедело во мај.
Според експертите, храната во земјава е најскапа во моментов и полека, кон есен, цените ќе почнат да се стабилизираат. Тоа го покажува и индексот на ФАО кој веќе се намалува. Инфлацијата, според НБРМ, ќе се врати напредкризното ниво во 2024 година.
