.webp){kind=icon}
Вкупниот број трансакции со платежни картички издадени од домашни издавачи на уредите лоцирани во земјата во 2021 година изнесува 132,5 милиони трансакции и забележа висок годишен раст од 22,7%, покажуваат најновите податоци на Народната банка.
Оттаму информираа дека во континуитет продолжува трендот на пораст на структурното учество на бројот на трансакции на физичките места на продажба за 2 процентни поени достигнувајќи 71 проценти во 2021 година, предизвикано од високиот годишен раст од 25,9 отсто, за сметка на намаленото учество на трансакциите за повлекување готовина од банкоматите (20 проценти) коишто забележаа поумерен раст од 8,9 проценти.
Како резултат на промената на навиките и културата на плаќањата на граѓаните и компаниите, употребата на платежните картички на домашните виртуелни (интернет) места на продажба забележа висок годишен раст од 32,4 проценти, иако нивното учество се задржа на стабилно и сѐ уште релативно ниско ниво (учество од 8 проценти).
Значителен годишен раст од 55,9 проценти во 2021 година е забележан во употребата на платежните картички издадени од домашни издавачи на уредите лоцирани надвор од земјата, при што се извршени 8,8 милиони трансакции.
