Зголемен бројот на банкротирани и згаснати фирми

Стапката на банкротирани правни лица во 2021 година изнесуваше 1 процент (0,8 проценти во претходната година), а учеството на згаснати субјекти во вкупниот број на активни правни лица достигна 12,2 проценти (зголемување од 2,2 процентни поена), покажуваат новите податоци на Народната банка објавени во извештајот за финансиската стабилност за минатата година.

Од централната банка нагласуваат дека стапката на згаснати субјекти сè уште е пониска од стапката на новоосновани правни лица, којашто во 2021 година го надмина и претпандемичното ниво и достигна 14,5 проценти. Од друга страна, продолжи трендот на намалување на бројот на субјектите со блокирана трансакциска сметка, коишто во 2021 година се сведоа на 22,1 проценти од вкупниот број субјекти во корпоративниот сектор.

„При бројни ризици од окружувањето, зголемена е чувствителноста на корпоративниот сектор на ризикот од несолвентност, којшто во голема мера остана ограничен во првата година на пандемијата, за што поддршка обезбедија обемните антикризни мерки. По истекувањето на мерките, во 2021 година, стапката на излез од пазарот на економските субјекти се зголеми, а евентуалното нејзино зголемување и во следниот период, може негативно да се одрази врз остварувањето на кредитниот ризик преземен од страна на домашните банки и раст на нефункционалните кредити на домашниот корпоративен сектор“, укажуваат од Народната банка.

Скромна ликвидност, микро-фирмите најранливи

Во текот на 2021, корпоративниот сектор ја подобри оперативната ефикасност, што придонесе показателите за ликвидноста да се задржат на стабилно, но скромно ниво. Домашниот корпоративен сектор во 2021 година забележа зголемување на нето работниот капитал (за 7,1 проценти на годишна основа) и благо забрзување на просечниот обрт на залихите и на побарувањата. Истовремено, видливо е скратување на должината на нето оперативниот циклус на околу десет дена, во услови на побрза наплата на побарувањата и намирување на обврските.

„Подобрената уредност во извршувањето на обврските е позитивен показател за способноста на корпоративниот сектор да го одржи ликвидносниот капацитет, и покрај истекувањето на важноста на антикризните мерки коишто ја потпомогнаа ликвидноста во претходната година. Сепак, видливи се разликите по одделни групи субјекти. Микросубјектите остануваат најранливата група субјекти коишто се најмногу изложени на ризици поврзани со ликвидноста, со оглед на тоа дека тие имаат најниски нивоа на показателите за моментната и тековната ликвидност и негативен нето работен капитал. Во тековниот контекст на нагласени ризици од окружувањето, нагласена е ранливоста и за останатите субјекти од корпоративниот сектор коишто би можеле да се соочат со притисоци врз ликвидноста и евентуално влошување на способноста за навремено намирување на долгот, особено доколку шокот потрае или се продлабочи во следниот период“, укажуваат од Народната банка.

Зголемена задолженост

Вкупната задолженост на домашниот корпоративен сектор умерено се зголеми во 2021 година и изнесуваше 49,5 проценти од БДП (47,3 проценти во претходната година). Умерено зголемена е и задолженоста со каматоносен долг, која на крајот од 2021 година изнесува 23 проценти од вкупните средства (22 проценти во претходната година).

„Во услови на отпочнување на процесот на економско заздравување, забележливо е зголемување на покриеноста на каматните расходи и расходите за финансирање со добивката од редовни активности, што укажува на подобрување на способноста за намирување на обврските од страна на корпоративниот сектор. За ова, покрај преовладувачките релативно ниски каматни стапки, свој придонес имаше и зголемувањето на профитабилноста на корпоративниот сектор“, се вели во извештајот.

Од Народната банка додаваат дека во 2021 година забрзал и растот на капиталот на корпоративниот сектор, што овозможи раст на должничкото финансирање, без позначително да се зголеми нивото на задолженост изразено како сооднос меѓу долгот и капиталот (финансиски левериџ) на корпоративниот сектор.

„Сепак, исклучително неизвесните глобални и домашни услови создаваат ризици за управувањето со долгот во следниот период, коишто се поизразени за субјектите со повисоко ниво на задолженост и оние што нема да успеат да го приспособат работењето на новонастанатите услови. Ранливоста повторно е најголема во однос на микросубјектите коишто прикажаа негативен финансиски резултат во 2021 година, а истовремено имаат и најголемо годишно влошување на показателите за задолженоста од веќе постојното повисоко ниво и намалување на, и онака, ниската ликвидност“, предупредуваат од Народната банка.

Во моментов нема коментари за веста. Биди прв да коментира...

Остави коментар