.webp){kind=icon}
Клучниот показател за потрошувачките цени во Соединетите Американски Држави (САД) порасна во септември на највисоко ниво во последните 40 години. Тоа уште повеќе го нагласува притисокот што континуираниот раст на инфлацијата го предизвикува кај домаќинствата и ги принудува американските Федерални резерви (ФЕД) да пристапат кон уште едно големо покачување на каматните стапки.
Индексот за раст на потрошувачки цени, што ги вклучува храната и енергијата, во септември порасна за 6,6 проценти споредено со истиот месец лани, што е највисоко ниво од 1982 година, покажуваат податоците на Министерството за труд. На месечно ниво базичната стапка на инфлација порасна за 0,6 отсто.
Вкупната инфлација во септември порасна за 0,4 проценти споредено со претходниот месец, односно за 8,2 отсто во споредба со ланскиот септември.
Просечните прогнозите во анкетата што Блумберг ја спроведе меѓу економистите укажуваа на 0,4 отсто месечен раст на базичната и 0,2 отсто на вкупната инфлација.
Во извештајот од Министерството за труд се наведува дека најголем придонес во растот на инфлацијата имаат поскапувањето на домувањето, храната и медицинските услуги. Цените на горивата се намалија. Извештајот нагласува дека високата инфлација се прошири во целата економија, што ги нагриза платите на Американците, присилувајќи многумина да се насочат кон заштедите и кредитните картички, со цел да одржат чекор со зголемените трошоци за живот.
Се очекува растот на потрошувачките цени во наредните месеци да биде умерен, што е постепено движење кон целта на ФЕД. Кресторите на монетарната политика одговорија преку најагресивното покачување на каматните стапки забележано од 1980-тите години, но до сега пазарот на работна сила и побарувачката останаа прилично отпорни. Стапката на невработеност во септември се врати на најниско ниво во последните пет децении, а компаниите продолжуваат да ги зголемуваат платите за да ги привлечат и задржат вработените, со цел да успеат да ја задоволат побарувачката од домаќинствата.
После солидниот извештај за вработување минатата недела, извештајот за инфлацијата веројатно ќе го зацементира дополнителното зголемување на каматните стапки од 75 базични бодови, планирано за на состанокот за монетарна политика што ќе се одржи во ноември. Инвеститорите ги зголемија облозите за покачување на каматните стапки следниот месец. По објавата на извештајот акциите забележаа остар пад, а приносите од државните обврзници пораснаа.
