.webp){kind=icon}
Се враќа ли пандемијата на ковид на голема врата во пресрет на зимските месеци е прашање што заслужува сериозно внимание, откако Кина неодамна соопшти дека дневните зарази со ковид надминале 30.000 случаи. Борејќи се да спречат ново ширење на болеста, кинеските власти вратија дел од непопуларните ограничувања низ најважните градови во земјата. Новите мерки предизвикаа масовни протести во одредени делови на Кина, што е вистинска реткост во оваа земја.
И додека на Истокот, каде што првпат изби заразата од смртоносниот вирус, се протестира, на Запад одредени инвеститори во фармацевтската индустрија со нетрпение го очекуваат крајот на годината, за да видат колкав пораст ќе остварат нивните акции по објавата на финансиските резултати на компаниите што се прославија со патентирање и продажба на вакцини против ковид-19.
Се сеќавате ли на „Фајзер“ и „Астра Зенека“?
Голема е веројатноста дека повеќемина од нас цел живот ќе ги памтат имињата „Фајзер“ (Pfizer) и „Астра Зенека“ (Astra Zeneca), иако светот секако сака што побрзо да заборави на пандемијата на ковид-19, која го смени нашиот начин на живеење и од која сè уште се чувствуваат последици по економијата. Причината е едноставна, многумина од нас се боцнати со вакцините против ковид произведени од двете компании. Тоа им донесе милијарди приходи на американската „Фајзер“ и на британската „Астра Зенека“ и радост на акционерите.
Имено, вредноста на акциите на „Фајзер“ во периодот на пандемијата имаше рекорден раст и речиси удвојување, по што, разбирливо, следуваше мало спласнување.
Bloomberg Chartmaker
Слична беше состојбата и со вредноста на акциите на „Астра Зенека“. Финансиските резултати на компаниите во изминатиов период се уште подобри. Имено, приходите на „Фајзер“ пораснаа од 51,8 милијарда долари во 2019 на 81,3 милијарда долари заклучно со 2021 година.
Bloomberg Chartmaker
Истовремено, заработката по акција се зголеми од 2,95 долари на 4,42 долари. Приходите на „Астра Зенека“ се зголемија од 24,4 милијарди долари во 2019 година на 37,4 милијарди долари во 2021 година. Заработката по акција во истиот период се зголеми од 3,50 на 5,29 долари.
Розови прогнози за акционерите, причини за загриженост на населението
Според процените на „Блумберг“, акционерите во двете компании допрва ќе ги тријат рацете, со оглед на тоа што за двете компании се прогнозира драстичен раст на приходите. Имено, се очекува приходите на „Фајзер“ да достигнат 100,4 милијарди долари во 2022 година, а заработката по акција да достигне 6,48 долари.
Истовремено, се прогнозира дека приходите на „Астра Зенека“ годинава ќе пораснат на 44,5 милијарди евра, а заработката по акција ќе достигне 6,67 долари.
Во случајот на двете компании станува збор за рекордни финансиски резултати, кои веројатно ќе опаднат или ќе се стабилизираат на ова ниво и во следната година, освен ако не заживее пандемијата, што повторно би довело до зголемена потреба од имунизација на населението и пораст на продажбите. Актуелната состојба во Кина го подгрева стравот дека сценариото за враќање на пандемијата не треба да се исклучува, особено поради веќе искусените мутации на вирусот, кој секогаш може да изненади.
Не треба да се заборави и дека двете компании повеќе години се меѓу најголемите играчи во фармацевтската индустрија на глобално ниво. Тие постојано работат на истражување и нудат богата палета производи и услуги за лекување различни болести, кои им носат огромни годишни приходи. Тоа е главната причина што меѓу најголемите акционери во двете компании се јавуваат реномирани институционални инвеститори.
