.webp){kind=icon}
Претседателот на Федералните резерви (ФЕД), Џером Пауел, рече дека ФЕД веројатно ќе ги подигне каматните стапки повисоко отколку што се мислеше и дека по неодамнешната низа на жешки податоци за работните места во САД, како и за инфлацијата, се подготвени да го забрзаат темпото на зголемувања доколку е потребно.
„Најновите економски податоци се посилни од очекуваното, што сугерира дека крајното ниво на каматни стапки веројатно ќе биде повисоко од предвиденото. Доколку севкупноста на податоците укаже дека е оправдано побрзо заострување, ќе бидеме подготвени да го забрзаме темпото на зголемување на стапките“, рече денеска Пауел во рамките на своето сведочење пред сенатскиот комитет за банкарство.
Приносите на обврзниците скокнаа, акциите паднаа, а доларот ги зголеми добивките по објавувањето на забелешките на Пауел. Трговците се обложуваат дека ФЕД најверојатно ќе ги зголеми стапките за половина поен на следниот состанок што ќе се одржи подоцна овој месец наместо да го продолжи темпото на раст од четвртина поен како од претходниот собир на банкарите.
Претставниците на ФЕД се обидуваат да ја оладат инфлацијата без да предизвикаат рецесија што ја зголемува невработеноста.
„Иако инфлацијата се намалува во последниве месеци, процесот на нејзино враќање на два отсто има за минување долг пат, кој веројатно ќе биде нерамен“, рече Пауел во своите забелешки објавени во Вашингтон. „Инфлацијата останува далеку над долгорочната цел на ФЕД“, додаде тој.
Демократите во Сенатот се претпазливи од брзиот пораст на каматните стапки, а некои веројатно ќе го засилат притисокот врз шефот на ФЕД да се повлече, додека републиканците го обвинуваат претседателот Џо Бајден за прекумерно стимулирање на економијата и го повикаа Пауел да ја продолжи борбата со инфлацијата.
ФЕД започна агресивна кампања за подигање на референтната стапка на заеми уште пред една година, достигнувајќи сега опсег меѓу 4,5 и 4,75 проценти. И покрај тоа, американската економија покажа извонредна издржливост. Податоците за вработени покажуваат зголемување на работните места за повеќе од еден милион во трите месеци што завршуваат во јануари, соопшти Министерството за труд, а неодамнешните податоци за потрошувачката и инфлацијата укажуваат на постојан притисок на цените.
Две сослушувања
Денеска Пауел беше во Капитол хил за првиот од двата дена од полугодишното сведочење за монетарната политика, што е негово прво појавување пред Конгресот од јуни. Тој утре треба да сведочи и пред Комитетот за финансиски услуги на Претставничкиот дом. Претседателот на ФЕД се соочува со пратениците што веќе одбројуваат до претседателските избори во 2024 година, чиј исход всушност би можел да зависи од способноста на Пауел да ја насочи инфлацијата назад кон целта на ФЕД од два отсто, без притоа да предизвика значителен пад.
Американските централни банкари велат дека треба да продолжат да ги притискаат каматните стапки за да го забават растот на цените. Во декември официјалните лица процениле дека каматите ќе достигнат врв од 5,1 отсто оваа година, според нивната просечна прогноза, но неколкумина рекоа дека серија силни економски извештаи би можеле да значат дека стапките можеби треба да се движат уште повисоко.
Инфлациски притисоци
Иако инфлацијата се намали од последниот пат кога Пауел сведочеше пред Конгресот, таа сè уште е далеку над целта на ФЕД од два отсто. Индексот за лична потрошувачка, најпосакуваниот мерач на цените за ФЕД, во јануари се зголеми за 5,4 проценти на годишно ниво.
„Ширината на пресвртот заедно со ревизиите на претходниот квартал сугерира дека инфлациските притисоци се повисоки од очекуваните од времето на нашиот претходен состанок“, рече Пауел.
Пазарот на трудот, за кој Пауел со месеци велеше дека е екстремно затегнат и неурамнотежен, допрва треба да ги издржи повисоките трошоци за задолжување. Стапката на невработеност во јануари се намали на 3,4 проценти и е најниска во повеќе од пет децении.
„И покрај забавувањето на растот, пазарот на трудот останува исклучително тесен“, рече Пауел.
