.webp){kind=icon}
Јужна Кореја планира да ја зајакне соработката со Индија, додека Сеул се обидува да се усогласи со притисокот од САД за диверзификација на глобалниот синџир на снабдување подалеку од Кина.
„Во ера на економска безбедност, од суштинско значење е да се зајакнат синџирот на снабдување и научната и технолошката соработка со Индија“, рече министерката за надворешни работи Парк Џин, која беше во дводневна посета на Индија. Парк рече дека Индија споделува универзални вредности како демократијата, поседува огромен потенцијал за раст и е клучен партнер за Јужна Кореја, се наведува во денешното соопштение на Министерството за надворешни работи.
„Деловните претприемачи што инвестираат и работат во Индија мора да одиграат клучна улога во реализацијата на тоа“, им рече Парк на деловните лидери во Ченаи.
Како одговор, делегатите ја истакнаа важноста од поттикнување посилна човечка и културна размена меѓу двете земји за зајакнување на економската соработка.
Администрацијата на претседателот Џо Бајден бара помош од сојузниците, вклучувајќи ја и Јужна Кореја, во намалувањето на зависноста на глобалниот синџир на снабдување од Кина, истовремено наметнувајќи огромни ограничувања на продажбата на напредна полупроводничка опрема. Индија е еден од добитниците во пошироката промена на пазарот, бидејќи компаниите како „Епл“ (Apple Inc) го зголемуваат производствениот капацитет во таа јужноазиска држава.
