.webp){kind=icon}
„Подобрување на патната инфратруктура и инвестициите во транспортот се клучните сегменти на кои треба да посвети вниманиe вашата земја“, изјави нобеловецот Пол Кругман на денешното излагање во рамки на меѓународната конференција „Скопски економски и финансиски форум – СЕФФ“ што се одржува во Скопје.
Тој додаде дека не е детално запознаен со македонската економија, но дека како копнена земја треба да им се посвети внимание на транспортното прашање, заедно со работната сила и образованието.
Кругман се осврна на повеќе теми во свооето излагање, меѓу кои и инфлацијата потенцирајќи дека истата е глобална и дека ја има и во САД и во Европа и насекаде во светот. Воедно тој се осврна и на влијанието на тековните случувања врз глобализацијата.
„Изгледите се дека се оддалечуваме од глобализацијата, и иако тоа се јавува како тенденција, сметам дека нема да дојде до целосно затворање на земјите. Трудоинтензивните дејности не очекувам да се вратат во развиените земји, тоа се големи инвестиции, но голема е веројатноста да се преселаат поблиску до развиените земји. Сепак, платите во земјите кои се поблиску до развиените се повисоки, но голема е веројатноста да се селат компаните од Азија во Централна америка, поблиску до САД. Додека пак за Европската унија тие што сакаат поблиску да се до Европа ќе се преселат во земји на Балканот, или во вашиот регион, иако платите тука не се ниски како во Бангладеш, но се пониски од Германија“, посочи Кругман.
Добитникот на Нобелова награда за економија осврнувајќи на состојбите по кризата предизвикана и од пандемијата, но и од војната во Украина, истакна дека се чувствуваат последиците, но засега не може да се зборува дали технички земјите ќе бидат во рецесија.
„Инфлацијата има високи стапки. Зборуваме за навистина прегреани економии. Пред некое време инфлацијата беше задржана само на одредени стоки, но сега гледаме дека таа се проширува. Добро е што економиите се жешки, но сега мислам дека е значајно тие да се оладат. Многу е важно да има еден период во кој економиите ќе растат побавно отколку нивниот производствен капацитет. Мора да се отстрани таа прегреаност. Дали ќе има рецесија во техничка смисла. Одговорот на тоа прашање е нејасен. Се разбира дека има можност за период на бавен, но не толку негативен раст и развој“, рече Кругман.
