.webp){kind=icon}
Да се купи часовник како подарок не е лесна задача. Што ќе одговара на вкусот на вашата сакана личност? Кој е најквалитетен?
Работата ја компликува и фактот што деновиве има долги листи на чекање за многу часовници од високата класа. Бранот на ентузијазам и неконтролираните шпекулации на секундарниот пазар, за кои се надеваме дека се ладат, оставија празни многу полици во продавниците. Многу омилени модели е апсолутно невозможно да се добијат. Сепак, сè уште се достапни многу убави часовници.
Руди Алберс, претседател на трговецот на мало со повеќе брендови на часовници „Вемпе УСА“ (Wempe USA), вели дека ги советува клиентите кога купуваат за некој друг да размислат за употребата на часовникот. „Ги прашуваме за што таа личност ќе го користи часовникот? Спортски активности, лежерни работи, формални настани?“
„Одредени подароци секогаш се хит. Особено мислам на 'картие' (Cartier), кој има класичен дизајн во различни големини“, додава Алберс.
„Оваа сезона, 'сантос' (Santos) е миленик и на мажите и на жените. Исто така, ако сакате на вашиот партнер или на некој од вашето семејство да му подарите одличен часовник, кој секогаш ќе биде ценет, набавете 'тудор' (Tudor)“.
Наведуваме листа од 17 часовници што можете да ги најдете на интернет или во продавниците денес, по избор на Крис Ровзар, уредник на „Блумберг пурсјутс“ (Bloomberg Pursuits), и Енди Хофман, известувач на „Блумберг“ во Женева, кој ја покрива швајцарската индустрија за часовници.
„ИВЦ пилот хронограф 41“ (IWC Pilot's Watch Chronograph 41)
Цена: 7.600 долари
За кого да го купите: Овој модел е за некој што сака стилски часовник со корисни функции како хронограф, време и датум.
Луѓето постојано ме прашуваат каков часовник треба да купат. Откако ќе ги обиколат најголемите трговски центри и продавници и ќе пробаат повеќе опции, брендот што најчесто го избираат е IWC. Секогаш ќе добивате комплименти за ваков IWC - хронограф од култната серија на авијатичарски часовници. - Крис Ровзар
IWC
„Вашерон константан историк американ 1921“ (Vacheron Constantin Historiques American 1921) во бело злато
Цена: 36.800 долари
За кого да го купите: Оние на кои им треба елегантен часовник за работа што е доволно необичен за да привлече внимание, како и оние што се грижат за светото тројство на часовничарите („патек филип“ (Patek Philippe), „одемар пиге“ (Audemars Piguet) и „вашерон константан“ (Vacheron Constantin).
Класикот за првпат лансиран во 1921 година, со дијагонален бројчаник за лесно читање додека возите, повторно заживеа со различни маски од 2009 година. Готвачот Ерик Риперт има прекрасно средена верзија на овој часовник; погледнете ја во книгата „Човек и неговиот часовник“ од Мет Хранек - што е исто така одличен подарок за љубителите на часовници! - Енди Хофман
Vacheron Constantin
„Зенит хрономастер спорт“ (Zenith Chronomaster Sport)
Цена: 11.000 долари
За кого да го купите: Ентузијасти што сакаат малку историја и се обожаватели на „ролекс дејтона“ (Rolex Daytona) и други, главно недостапни спортски рачни часовници.
„Зенит“ е мал швајцарски производител што доживува замав. Продажбата расте, а листите на чекање за некои модели се зголемуваат (вклучувајќи го и овој на некои пазари, иако сепак е многу полесно да се добие во споредба со „дејтона“). Не само што брендот го произведува признаениот, неверојатно прецизен механизам El Primero (кој се наоѓа во срцето на овој и на многу други часовници на производителот), туку има и прекрасно минато. - К.Р.
Zenith
„Брајтлинг навитајмер Б01“ хронограф (Breitling Navitimer B01)
Цена: 10.440 долари
За кого да го купите: Професионални пилоти или аматери што сакаат да ѝ оддадат почит на историјата на авијацијата; или секој што сака нешто колоритно на раката.
„Навитајмер“ (називот е комбинација од зборовите навигација и тајмер) беше една од иновациите што засекогаш го променија производството на часовници и де факто пилотските часовници со децении. Овде ја цитирам веб-страницата „Брајтлинг“: „Во 1952 година, Вили Брајтлинг разви хронограф со кружна лизгачка рамка што ќе им овозможи на пилотите да ги извршат сите неопходни пресметки на летот“.
Основата со боја на ф'стак на класичен хронограф, со подносливи 41 милиметар, го прави овој модел извонреден. - Е.Х.
Breitling
„Фредерик констан ворлдтајмер“ (Frederique Constant Worldtimer)
Цена: 4.495 долари
За кого да го купите: За оние што треба да водат сметка за колегите што живеат во различни региони; за оние што сакаат многу по добра цена.
„Ворлдтајмер“ има една од моите омилени компликации (секоја карактеристика на механички часовник освен приказот на часови, минути и секунди), особено затоа што патувам поради работа и управувам со тим што се прошири од Дубаи до Лос Анџелес. Ужасно ми е тешко да следам кога сите се на своето биро, а иритирачки е постојаното навраќање на функцијата светски часовник на телефонот. Фредерик Констан е солиден швајцарски хоролог, кој прави компликувани движења по многу поволна цена. Ова веројатно ќе биде следниот часовник што ќе го купам. - К.Р.
Frederique Constant
„Тудор блек беј про“ (Tudor Black Bay Pro)
Цена: 4.000 долари
За кого да го купите: Активна личност што сака часовник со многу цврст изглед, одлична сигурност, умерена големина (39 милиметри) и умерена цена.
„Тудор“ е сестринска марка на „ролекс“ и обично продава слични часовници со сличен квалитет, по околу половина од цената. „Блек беј про“ со автоматско навивање е верзијата на „тудор“ на стариот „ролекс експлорер 2“ (Rolex Explorer II). Препорачувам да го набавите со новата микроприспособлива белезица. - Е.Х.
Tudor
„Бум и мерси хемптон 10666“ (Baume & Mercier Hampton 10666)
Цена: 4.350 долари
За кого да го купите: Некој што редовно патува поради работа и сака елегантен малку воздржан часовник, кој одлично оди со костум.
Оваа година го пробав на саем во Женева и веднаш помислив: „Има најмногу од она што го барам кај часовник“. Има атрактивно правоаголно куќиште со бројчаник со текстура и придушено ремче од црна алигаторска кожа. Тоа е часовник со двојно време, кој е многу корисен кога патувате, за да можете да ги следите времето во кое сте и времето дома. Приказот на датумот е голем и јасен (наречете ме сноб, но мразам да носам часовник што не ме потсетува на датумот) и е автоматски со резерва на енергија од 42 часа, што значи дека нема навивање. - К.Р.
Baume & Mercier
„Картие тенк маст соларбит“ (Cartier Tank Must Solarbeat)
Цена: 2.790 долари
За кого да го купите: Оние што сакаат врвни класични часовници со доза нова свежина.
Правоаголниот „картие тенк“ можеби е најпрепознатливиот луксузен часовник во светот: тој е уникатен, безвременски и доаѓа од историскиот бренд што придонесе да се измисли машкиот рачен часовник за слободно време. Оваа верзија на моделот работи на соларен погон со фотоволтаични ќелии, интегрирани зад класичните римски бројки. - Е.Х.
Cartier
„Булгари окто финисимо“ (Bvlgari Octo Finnissimo) во титаниумска изведба
Цена: 15.400 долари
За кого да го купите: Личност што сака уникатен часовник, кој е потајно поубав од оној што го носи шефот; за љубителите на титаниум, кој во моментот важи за популарен метал.
Со текот на годините, римскиот златар „Булгари“ ги усоврши своите вештини во светот на производството на часовници од високата класа, создавајќи сè поимпресивни и сè покомпликувани часовници. Линијата „окто финисимо“ не личи на ништо друго. Носев многу, тие се неверојатно лесни и прекрасно се вклопуваат на раката, дури и под манжетната. – К.Р.
Bulgari
„Норкејн фридом 60 ГМТ“ (Norqain Freedom 60 GMT)
Цена: 3.890 долари
За кого да го купите: За иновативен колекционер на часовници што сака да додаде нешто неконвенционално и ново (но со старински шмек) во својата колекција; за оние што често патуваат и треба да следат различна временска зона.
Ако не сакате „тудор ГМТ“ (Tudor GMT), кој го имаат сите други по слична цена, овој релативно млад швајцарски бренд нуди алтернатива практично со исто внатрешно движење. „Норкејн“ сега ја има индустриската легенда Жан-Клод Бивер како советник во својот одбор. - Е.Х.
Norqain
„Жежер лекутр трибјут дуофејс календар“ (Jaeger-LeCoultre Tribute Duoface Calendar)
Цена: 14.500 долари
За кого да го купите: За светски патник што сака елегантен часовник, кој е воздржан по однос на големината и светкавоста; за некој што ужива во ретрочувството на рачно навивање секој ден.
Препознатливите правоаголни часовници „реверзо“ (Reverso) на „Жежер Лекутр“ првично биле создадени во 1931 година, за да може поло-играчите да ги превртат наопаку за да го заштитат стаклениот дел на часовникот од несакан удар од палката. Тие никогаш нема да излезат од мода, а Алберс вели дека „Вемпе“ има модели во широк спектар на бои подготвени за продажба. Арт-деко дизајнот е веднаш препознатлив за љубителите на часовници, а со текот на годините, од неговото потекло засновано околу коњите, брендот додаде разни други лица на часовникот и компликации на грбот; кога ќе го завртите, гледате друг бројчаник. Овој има индикатор за ден, датум и месец на едната страна и корисна втора временска зона на задната страна. - К.Р.
Jaeger-LeCoultre
„Омега спидмастер '57“ (Omega Speedmaster '57)
Цена: 8.600 долари
За кого да го купите: За оние што сакаат да започнат колекција со еден од најлегендарните часовници во историјата; за некој што мисли дека е кул рачно да се навива ова мало механичко чудо.
Ова е прекрасен часовник, бидејќи е еден од најпознатите на планетата (и пошироко). Бидејќи е носен на сите шест лунарни мисии, „спидмастер“ има незаменливо наследство. Со широките стрелки на оригиналниот „спидмастер“, кој дебитира во 1957 година, пред да стигне брендот на Месечината, и со големина од 40,5 милиметри, која е лесна за носење, овој часовник е доволно добар за Џорџ Клуни и доволно добар за вашата сакана личност. - Е.Х.
Omega
„Хермес Х08“ (Hermes H08)
Цена: 7.450 долари
За кого да го купите: Личност што сака часовник што изгледа еднакво добро на работа и во вежбалница.
Француската луксузна куќа „Хермес“ е секако најпозната по своите шалови и чанти, но во последните две децении направи огромен напредок во светот на сериозните производители. Во 2021 година, нејзината продажба се проби на листата на најдобрите 20 швајцарски производители на часовници, во голема мера благодарение на овој модел, кој дебитира таа година.
Текстурата, квадратната кутија со заоблени рабови и карактеристичните бројки го издвојуваат од преостанатите, а импресивно е тоа што механизмот за самостојно навивање е изработен од компанијата. - К.Р.
Hermès
„Балтик бикомпакс 002“ (Baltic BiCompax 002)
Цена: 568 долари
За кого да го купите: За оние што сакаат часовник со уникатен изглед по многу добра цена.
Тешко е да се надмине овој класичен часовник со хронограф по оваа цена. Брендот со седиште во Париз носи свој шмек во класичниот дизајн на часовниците и ги прави работите многу пристапни благодарение на кинескиот рачен механизам „сигал“ (Seagull). - E.Х.
Baltic
„Бремонт фјури блу“ (Bremont Fury Blue)
Цена: 7.316 долари
За кого да го купите: За некој Британец.
Пред Првата и Втората светска војна, Велика Британија беше дом на некои од најважните светски производители на часовници, но до неодамна таму не се случуваше многу. Тоа се промени кога Гајлс и Ник Инглиш, браќа опседнати со авијација, класични автомобили и добри часовници, го лансираа „бремонт“ во 2002 година, со цел да го вратат производството на часовници на британскиот остров. Во 2021 година, тие го отворија „Винг“ (Wing), комплекс од фабрика и дизајнерска работилница во близината на Хенли, а во 2022 година почнаа да продаваат часовници со сопствен внатрешен механизам, вклучувајќи го и овој син пилотски часовник „бремонт фјури“, кој има самостојно навивање од резервна енергија 65 часа. - К.Р.
Bremont
„Еш мозер ен компани пионир центер секондс“ (H. Moser & Cie. Pioneer Center Seconds)
Цена: 15.300 долари
За кого да го купите: За љубителите на бои.
„Мозер ен компани“ е независен швајцарски производител на часовници најпознат по својата квалитетна изработка, бројчаници со светли бои и изразено нешвајцарски трикови, како што е правење часовник од швајцарско сирење. За многу нивни часовници има листи на чекање, но овој може да се купи денес. - К.Р.
H. Moser & Cie
„Орис дајверс сиксти фајв“ (Oris Divers Sixty-Five)
Цена: 2.400 долари
За кого да го купите: Некој што го сака изгледот на нуркачките часовници, со истакната, згодна рамка.
„Орис“ е независен швајцарски производител на часовници со сериозен фокус на одржливоста. Го сакам овој автоматски нуркачки часовник со наизглед старински омбре-бројчаник и куќиште и белезица во двобојна бронза. Дејствува старомодно, но сепак изгледа свежо. - К.Р.
Oris
