.webp){kind=icon}
Какви ќе бидат политиките за исплата на дивиденда на компаниите што котираат на Македонската берза е прашање што се актуализира меѓу инвеститорите при одбројувањето на последните денови од 2022 година. Уште едно важно прашање е каков е дивидендниот принос на акциите (соодносот помеѓу исплатената дивиденда и моменталната пазарна цена), со оглед на тоа што станува збор за еден од главните показатели за стапката на поврат од инвестициите во акции. „Блумберг Адрија“ ги анализираше досегашните дивидендни политики на некои од котираните компании и дивидендниот принос. Тие можат многу да помогнат при одлуките за инвестирање што евентуално би ги носеле следната година. Кои се главните играчи на берзата, кои носат пари, кои носат сигурни пари? Дивидендната историја е главен показател за тоа.
На Македонската берза има компании што редовно секоја година во континуитет исплаќаат дивиденда, но има и такви што прескокнувале одредени години. „Алкалоид“ е една од компаниите што со години редовно исплаќаат дивиденда, а карактеристично за оваа компанија е што од година на година има постојан раст на износот на дивидендата, што е вистинска реткост на берзата. Историските показатели покажуваат дека висината на дивидендата варира кај повеќето компании, и тоа во зависност од остварените резултати и интерните политики. Пример за тоа е „Македонски телеком“, каде што дивидендата во изминативе неколку години е неколкукратно помала отколку во периодот пред 2010 година.
Во изминативе години, раст има и кај дивидендата на „Комерцијална банка“. „НЛБ банка“ не исплати дивиденда за минатата година, а кај „ТТК банка“ има намалување на износот.
Кога станува збор за сумите што се исплаќаат за дивиденда, статистиката открива дека меѓу компаниите што исплаќале убедливо најголеми дивиденди се вбројуваат „Усје“, „Фершпед“ и „Макпетрол“, меѓутоа кај првите две компании последниве години има намалување на износот, додека кај нафтената компанија лани е поставен своевиден рекорд.
Можеби за некои од инвеститорите ќе биде изненадувачки што меѓу првите три компании со моментално (23.12.2022) најголем дивиденден принос нема некој од гигантите на берзата. Така, на првото место е „Ветекс“, со дивиденден принос од 37,79 проценти, на второто место е БИМ „Свети Николе“ (11,79 проценти), а на третото место е „РЖ техничка контрола“ (11,11 проценти).
Сепак, дивидендата и дивидендниот принос се само дел од показателите што инвеститорите треба да ги земат предвид при одлучувањето во кои акции да инвестираат на берзата. Приходите и добивката на компаниите, инвестициските планови и идните очекувања на менаџерите, стапката на поврат на капиталот, геополитичките случувања, пазарните и макроекономските услови, конкуренцијата и многу други фактори може значително да ги сменат околностите и вредноста на една компанија.
Со помош на Александра Томиќ
