Берзанските индекси низ светот се во црвената зона

Кинеската економска кал одекна надвор од националните пазари, при што утрово азиските акции паднаа заедно со американските и европските фјучерси. Азискиот мерач на капитал се упати кон најниското затворање во повеќе од два месеца, бидејќи загубите на регионалните референтни вредности се забрзаа откако Кина го објави најмекото читање во нејзиниот индекс на менаџери за набавки од декември.

Индексот во Хонгконг падна за повеќе од два отсто, со што се повлече од највисокото ниво од јануари на речиси 24 проценти пониско. Јужнокорејскиот индекс ги избриша добивките што претходно го водеа кон биковски пазар. Договорите за S&P 500 и Euro Stoxx 50 паднаа по објавувањето на кинеските податоци, што ја нагласи загриженоста за силата на закрепнувањето во втората по големина економија во светот.

 

 

Во рамките на синоќешното тргување во САД, индексот Nasdaq 100 додаде 0,4 отсто на вредноста, со што го продолжи годинешниот пораст на 31 отсто. Тој заврши на највисоко ниво за тој ден на тргување, бидејќи инвеститорите се понесени од возбудата за вештачка интелигенција, која го зголеми индексот. „Енвидија“ (Nvidia Corp) надмина една илјада милијарди долари во пазарна капитализација откако објави неколку производи поврзани со вештачката интелигенција. Според Кети Вуд, извршна директорка и основачка на „Арк инвестмент“ (Ark Investment Management), провајдерите на софтвер поврзани со вештачка интелигенција сега ќе ги искористат придобивките што ги има „Енвидија“.

„За секој долар хардвер што го продава 'Енвидија', провајдерите на софтвер ќе генерираат приходи од осум долари“, рече таа во гостувањето на телевизијата „Блумберг“.

На другите пазари, мерачот на американскиот долар се искачи повисоко, бидејќи зелената валута се зголеми наспроти повеќето од нејзините валутни конкуренти од Групата 10 најтргувани. Еврото на пример падна во однос на доларот за 0,4 проценти и овие валути се разменуваат по курс од 1,0697 долар за евро.

Нема добро расположение на криптопазарот. Таму најголемиот токен, биткоинот, загуби 1,5 процент од вредноста и сега е на ниво од 27.348,29 долари, а етерот падна за 1,3 отсто, на 1,879,25 долари.

Инвеститорите остануваат фокусирани на договорот за ограничување на американскиот долг, склучен од претседателот Џо Бајден и претседателот на Претставничкиот дом, Кевин Мекарти. Мекарти изрази уверување дека пратениците навреме ќе донесат легислатива за да се спречи неплаќање на САД. Нацрт-законот треба да биде ставен на гласање во Претставничкиот дом до вечерва. Преминот таму е клучен за добивање одобрение во Сенатот, каде што инаку има отпор од Републиканската партија, до крајниот рок в понеделник.

Во меѓувреме, претседателот на Банката на федерални резерви (ФЕД) на Ричмонд, Томас Баркин, рече дека бара знаци дека побарувачката се лади за да биде убеден дека американската инфлација ќе се намали. Инвестицискиот институт „Блекрок“ (BlackRock) смета дека ФЕД се приближува до пауза во зголемувањето на каматите.

Трговците ги одмеруваат и најновите американски економски извештаи, при што довербата на потрошувачите падна на најниско ниво во последните шест месеци, бидејќи погледите за пазарот на трудот и изгледите за деловните услови се лизнаа пред договорот за зголемување на максималната граница на американскиот долг.

Во моментов нема коментари за веста. Биди прв да коментира...

Остави коментар