.webp){kind=icon}
Акциите во Азија денеска пораснаа, а доларот падна по најавата на Федералните резерви (ФЕД) во САД дека во иднина ќе го забават темпото на монетарното затегнување.
Реперот на акциите во Азија порасна нешто помалку од еден отсто, но добивките беа помали отколку во средата кога S&P 500 порасна за 2,6 отсто, а Nasdaq 100 за 4,3 отсто. Падот на фјучерсите сугерира дека растот во САД може да забавува.
ФЕД вчера ги зголеми стапките за 75 базични поени втор месец по ред и сигнализираше дека таков потег е повторно возможен. Челникот Џером Пауел додаде дека темпото на зголемување на каматните стапки сепак ќе се забави во одреден момент и тоа ќе се одредува од состанок до состанок.
Државните обврзници стагнираа, со 10-годишен принос од 2,78 отсто, а јенот зајакна за околу еден отсто во однос на доларот како резултат на одлуката на ФЕД. Нафтата поскапе до 99 долари за барел. Златото и биткоинот пораснаа.
Вакви изливи на оптимизам на пазарот по одлуките на ФЕД веќе се видени и претходно, но тие брзо би се стопиле под влијание на негативни фактори како што се стравот од рецесија, европската енергетска криза и проблемите со кинескиот сектор за недвижности.
Bloomberg
Аналитичарите не веруваат дека темпото на зголемување на каматните стапки од страна на ФЕД би можело значително да забави во иднина бидејќи инфлацијата се покажува прилично тврдоглава, а некои од нив предвидуваат дека американската централна банка ќе ги зголеми трошоците за задолжување над 4 отсто во 2023 година.
Пазарите сега ги чекаат податоците за движењата на американската економија, како и резултатите од телефонскиот разговор меѓу американскиот претседател Џо Бајден и кинескиот Си Џинпинг, кој би можел да допре до американските царини и други проблематични точки.
