.webp){kind=icon}
Спомнувањето на криптовалутите во текот на празничните прослави поттикнуваше разговори за криза, измама и крај на една ера. Но откако сите се вратија на работа, најголемата дигитална валута - биткоинот - минува низ деветдневна победничка серија.
Биткоинот се зголеми за 7,2 отсто во четвртокот и се тргуваше за околу 18.830 долари, што е најмногу од почетокот на ноември, кога започнаа првите знаци за проблеми на берзата FTX и кривичните пријави што ја десеткуваа криптоиндустријата. Криптовалутата е во својата најдолга победничка серија од бумот во јули 2020 година, покажуваат податоците на „Блумберг“.
Другите токени исто така напредуваа, при што етер скокна за 6,2 проценти и премина над 1.400 долари. Но Волстрит, наместо да предвидува ненадејно заживување на криптоманијата, гледа на добивките како резултат на промената во расположението на инвеститорите што ги подига акциите во технолошкиот сектор и другите ризични инвестиции.
„Ми се чини дека биткоинот напредува во хармонија со акциите/ризичните средства“, вели Џејк Гордон од „Биспоук“ (Bespoke Investment Group). „Најинтересно е тоа што растот на биткоинот избива од многу тесниот опсег од почетокот на сагата за FTX. Следните неколку дена ќе бидат добар тест ако ги надмине декемвриските максимуми“, додава тој.
Движења на биткоинот и технолошките акции
Bloomberg
Биткоинот помина голем дел од изминатата година тргувајќи се во тандем со акциите, особено технолошките акции. Сите беа погодени кога Федералните резерви започнаа кампања за зголемување на каматните стапки и намалување на ликвидноста за да се спречи најбрзата инфлација во последните децении.
Корелацијата беше прекината со пропаѓањето на FTX и падот на криптовалутите, но се врати во новата година. S&P 500 зајакна за 3,8 отсто во 2023 година, додека Nasdaq 100 напредуваше 4,8 отсто.
„Пазарите годинава имаат нијанса на ризик и тоа е она што му помогна на криптото. Повеќе се тргува на основа на факторот ризик отколку со некакви фундаментални анализи“, вели Крис Гафни, претседател за глобални пазари во „ТИАА банк“ (TIAA Bank). Тој додава дека ловците на поволни цени можеби трагаат низ урнатините на криптовалутите, што следува по повеќемесечната распродажба.
