.webp){kind=icon}
Растот на биткоинот во 2023 година запре откако привлечно се приближи до трговскиот сигнал (параметар што претставува еден вид поттикнувач за купување/продажба на средство; генериран од индикатори за техничка анализа или математички алгоритми и им помага на трговците/инвеститорите да ги предвидат тенденциите на пазарот, заб. на превод) што последен пат беше виден кога токенот поставуваше рекорди.
Падот на криптовалутата од речиси четири отсто во седум дена (до неделата) беше најголем неделен пад од ноември, намалувајќи го нејзиниот годишен раст, до денеска, на 39 отсто.
Биткоинот останува на работ на таканаречениот златен крст (шема што укажува на потенцијално позначителен раст на вредноста на средствата, заб. на превод), каде што просечната цена од 50 дена ја надминува 200-дневната. Таа шема беше забележана пред формирањето на биковскиот пазар во 2020 и 2021 година.
„Повеќето случаи на златен крст резултираа со поволни приноси за биткоинот, а многу од нив се случија во, долгорочно гледано, клучни пресвртни точки“, напиша во белешка Шон Фарел, шеф на стратегија за дигитални средства во „Фондстарт глобал адвајзорс“ (Fundstrat Global Advisors).
Педесетдневниот просек на биткоинот има тенденција да држи ниво над 200-дневниот
Bloomberg
Во текот на изминатите пет години, биткоинот пораснал во просек за 22 отсто во текот на 60 дена по достигнувањето на златниот крст, според податоците собрани од „Блумберг“. Но очигледната разлика помеѓу ерата на лесни пари во 2020 и 2021 година (кога некои вкрстувања му претходеа на раст до историски максимум) и сегашната ситуација е дека централните банки сега ги зголемуваат каматните стапки за да се борат против инфлацијата.
Податоците од официјалниот американски извештај за вработувањата во петокот ги урнаа очекувањата дека таквото заострување на политиката наскоро ќе заврши и можеби ќе доживее пресврт годинава. Од друга страна, токму на тие очекувања беа правени оптимистички облози, со кои започна јануарската преродба на светските пазари. Тој подем ги зафати големите и малите криптовалути - почнувајќи од биткоин и етер до Axie Infinity и токените на Децентраленд.
Податоците за платните списоци ги зголемија приносите на државните обврзници, што е клучен фактор за поттикнување на побарувачката за поризични инвестиции, според Џон Торо, шеф за тргување на берзата за дигитални средства „Индипендент ризрв“ (Independent Reserve).
Повисоки приноси
„Доколку е точно дека пазарот на обврзници останува лидер во однос на ризичните средства, пазарот на криптовалути би можел да здивне додека ризичните средства не воспостават соодветни цени за повисоки приноси“, рече тој.
Индустријата за дигитални средства, исто така, се соочува со тековни предизвици поради минатогодишниот длабок пораз и колапсот на компании како берзата ФТХ (FTX).
Илјадници работни места се изгубени само оваа година, а меѓу најновите на листата на компании што треба да направат кратења се криптоплатформата Битрекс (Bittrex - 83 отпуштања) и развивачот „Протокол лабс“ (Protocol Labs - околу една петтина од работната сила).
Податоците собрани од „Коин геко“ (CoinGecko) покажуваат дека отпуштањата во криптосекторот во јануари - речиси 3.000 отпуштања - беа најмногу во изминатите 12 месеци, освен во јуни 2022 година, откако пропадна екосистемот тераУСД (ТerraUSD) од 60 милијарди долари.
Биткоинот, најголемиот токен по пазарна вредност, малку се промени за да се тргува со 22.900 долари напладне во Сингапур. Второпласираниот етер исто така беше стабилен. Помалите токени, како кардан и полкадот, осцилираа меѓу добивки и загуби.
