.webp){kind=icon}
Министерството за финансии на САД ќе ја предводи новата работна група што наскоро ќе започне со редовни дискусии за можното лансирање дигитален долар.
„Групата ќе вклучува лидери од Министерството за финансии, Федералните резерви (ФЕД), Советот за национална безбедност и други агенции“, рече во средата Нели Лиjанг, потсекретарка за домашни финансии во Министерството за финансии.
Во следните месеци групата „ќе започне редовно да се состанува за да разговара за можната CBDC (анг. Central Bank Digital Currency - дигитална валута на централната банка) и други иновации за плаќање“, рече Лијанг во обраќањето на настанот организиран од аналитичкиот центар „Атлантски совет“ во Вашингтон.
Дискусиите најверојатно ќе се вртат околу тоа дали американската CBDC ќе помогне да се одржи глобалното финансиско лидерство на САД, да се зачува националната безбедност и да се заштити приватноста, а истовремено да се спречи нејзината употреба во незаконски финансиски трансакции, рече таа.
Лијанг јасно стави до знаење дека најавата не треба да се сфати како сигнал дека администрацијата на Бајден целосно го прифатила концептот на дигитален долар, повторувајќи дека Министерството за финансии и ФЕД сè уште не се убедени дека има потреба од американска CBDC.
„ФЕД спроведува технолошко истражување и експериментирање за да дојде до добро информирана одлука за да може да издаде CBDC доколку се утврди дека е во национален интерес“, рече таа.
Лијанг забележа дека подобрен меѓубанкарски платен систем може да поништи дел од привлечноста на CBDC. ФЕД моментално работи на воведување широкодостапен систем за плаќање во реално време за американските банки.
Таа, наедно, ја повтори загриженоста кај носителите на одлуки дека широкодостапен CBDC може да ја загрози стабилноста на традиционалниот банкарски систем.
„Исто така, постојат ризици за малопродажбата на CBDC (разликата меѓу т.н. малопродажба и големопродажба на CBDC е дека првата е наменета за трансакции на мало, а втората е меѓубанкарска и за сродни операции), кои можат да го дестабилизираат кредитирањето на приватниот сектор за време на стрес“, рече таа.
Без оглед на тоа дали САД ќе усвојат CBDC или не, администрацијата на Бајден сака да биде вклучена во меѓународното планирање неопходно за воведување повеќе дигитални валути. Лијанг посочи дека новата американска работна група ќе се обиде да се поврзе и со други влади и меѓународни агенции во однос на ова прашање.
„Имаме интерес да обезбедиме CBDC безбедно и ефикасно да комуницира со постојната финансиска инфраструктура, за да ги поддржи финансиската стабилност и интегритетот на меѓународниот финансиски систем“, рече таа.
Глобалните платежни системи, како што додаде Лијанг, треба „да продолжат да ги одразуваат широкораспространетите демократски вредности, како што се отвореноста, приватноста, пристапноста и одговорноста кон заедниците што се потпираат на нив“.
Нејзините коментари доаѓаат речиси една година откако претседателот Џо Бајден потпиша извршна наредба со која се упатуваат голем број федерални агенции, вклучувајќи го и Министерството за финансии, да посветат поголемо внимание во проучувањето и идното регулирање на дигиталните средства, кои би можеле да вклучуваат низа криптовалути, како што е биткоинот, стабилни криптовалути и дигитални пари издадени од централните банки.
