.webp){kind=icon}
Поранешниот министер за финансии на САД, Лоренс Самерс, предупредува дека може да има „сериозни“ последици за иновацискиот сектор на американската економија доколку регулаторите не се справат соодветно со колапсот на Силикон Валеј банк (СВБ).
„Тоа сигурно ќе има многу значајни последици за Силициумската долина и за целиот сектор за ризичен капитал кој беше динамичен доколку владата не се погрижи оваа ситуација да се реши на соодветен начин“, рече Самерс за ТВ Блумберг.
СВБ пропадна по неуспешен обид за инјектирање капитал и силно повлекување на депозитите што ги чуваат технолошките старт-ап компании во банката.
Надзорот за банкротот на СВБ го презеде агенцијата „Федерал депозит иншуренс“ (Federal Deposit Insurance Corp,) која Конгресот ја формираше за да се грижи за осигурувањето на штедните влогови, но осигурува само депозити до вредност од 250 илјади долари. Од друга страна, голема сума на пари складирани во банката не била осигурана, дури повеќе од 93 отсто.
„Има десетици, ако не и стотици, почетни компании кои планираа да ги искористат тие пари за исплата на платите следната недела. Ако тоа не е можно, последиците за иновативниот сектор ќе бидат сериозни“, смета Самерс.
Тој додава дека се надева дека регулаторите ќе бидат „агресивни“ во запирање на ширењето на проблемот.
„Ова не е време за лекции за морални ризици. Имаме доволно предизвици во економијата и без последици од евентуален дефект на важен економски сектор“, посочува поранешниот министер за финансии.
Министерката за финансии Џенет Јелен во петокот објави дека американскиот банкарски сектор останува отпорен и дека регулаторите имаат доволно алатки за да се справат со ситуацијата со СВБ.
Самерс, исто така, смета дека случајот нема да се претвори во системски проблем.
Во Обединетото Кралство и Германија, регулаторите исто така ги следат последиците од колапсот на СВБ.
Во извештајот за оваа банка во Германија за 2021 година се наведува дека таа е мала институција која не подлежи на капитални барања поради нејзиното потпирање на матичната компанија за обезбедување капитал и ликвидност.
Во Велика Британија, претставништвото на банката објави дека е посебна и независна институција која има посебен биланс и е под надзор на британскиот регулатор, а со нејзините депозити се управува исклучиво во ОК.
