Златото расте по мешаните податоци за пазарот на работна сила во САД

Вредноста на златото порасна најмногу во последниот месец, по објавата на извештајот за вработување во САД, кој даде мешана слика за пазарот на работна сила, дополнително замаглувајќи ги процените за зголемување на каматната стапка од страна на американските Федерални резерви (ФЕД).

Bloomberg Mercury

 

Златото денеска порасна за 2,2 отсто, на 1.664,94 долари за унца, и е на пат да оствари неделна добивка од околу 1,2 отсто. Пораснаа и среброто, платината и паладиумот.

Бројот на работни места минатиот месец порасна за 261.000, не вклучувајќи ги земјоделците во оваа статистика, што е далеку над просечните процени на економистите. Во меѓувреме, стапката на невработеност порасна повеќе отколку што се очекуваше.

Доларот падна најмногу од август, зајакнувајќи го златото, чија цена се изразува во американската валута.

„Тоа нема да влијае на промена на ставот на ФЕД во врска со пазарот на работна сила и заканата од инфлација. Но, златото и среброто едноставно не реагираа на изреката дека ’добрите вести се лоши вести’ во јастребовските ставови на ФЕД“, рече Ники Шилс, раководител за стратегија со метали во MKS PAMP SA.

Но извештајот не дава јасна слика ниту назнаки дека пазарот на работна сила се лади, што би овозможило ФЕД да забави со покачувањето на каматите.

Златото оваа година падна за околу 20 проценти, поради немилосрдната монетарна политика на ФЕД, што ја намалува привлечноста на средствата што не носат принос, како што е златото. Претседателот на ФЕД, Џереми Пауел, сигнализира дека помалку агресивно заострување на каматите би можело да биде прикладно за во иднина, откако на овонеделниот состанок банкарите ја зголемија каматната стапка за уште 75 базични бодови. „Сепак, монетарната политика веројатно ќе мора да биде порестриктивна отколку што претходно се предвидуваше за да се олади високата инфлација“, рече Пауел во средата.

Во моментов нема коментари за веста. Биди прв да коментира...

Остави коментар