.webp){kind=icon}
Индонезија, која е извор на четвртина од резервите на никел, предлага да се формира организација слична на ОПЕК за металот што се користи во производството на батерии, со цел да се координираат производството и испораката.
Тамошниот министер за инвестиции Балил Ладалија на состанокот со канадската министерка за меѓународна трговија, Мери Нг, ја искажа идејата за создавање картел по примерот на ОПЕК, на маргините на самитот на Г20 на Бали, се наведува во соопштението од Министерството. Владините претставници на истата тема разговарале и со челниците од Австралија.
„Сојузот на земји богати со минерали би помогнал за обединување на владините политики и за поттикнување развој на оваа индустрија“, рече Ладалија. Индонезија минатата година произведе еден милион тони никел, додека Австралија и Канада заедно произведоа 200.000 тони, покажуваат податоците од Геолошкиот институт на САД.
Идејата од Индонезија е најнова по низата иницијативи за исполнување на амбициите да стане глобален центар за батерии за електрични возила. Одлуката за забрана за извоз на рудата никел од 2020 година ја поттикна Европската Унија (ЕУ) да поднесе жалба до Светската трговска организација.
Индонезија сака да ја прошири својата улога на главен извозник на никел за батерии, додека побарувачката за зелени превозни средства нагло расте на пазарите како САД, Кина и Европа.
ОПЕК, скратеница од Организација на земји извознички на нафта, ги вклучува најголемите производители на нафта, како Саудиска Арабија и другите земји од Блискиот Исток. Влијателниот сојуз ги координира понудата и цената на нафтата меѓу членките.
„Со таква соработка, се надеваме дека сите земји производители на никел еднакво ќе имаат корист од создавањето дополнителна вредност на оваа суровина“, рече Ладалија, според кого Владата се приближува со ставовите кон Канада и Австралија, кои се меѓу десетте нaјголеми светски производители на никел.
„Оваа соработка ќе биде особено корисна, а исто така ќе ги следи правилата на меѓународната трговија“, рече индонезискиот министер за инвестиции. Неговата земја ќе чека потврдна информација од двете влади со кои засега преговара во врска со идејата за ваков сојуз.
„Индонезија, исто така, разговарала и за забрзување на потенцијалниот трговски договор со Канада. Двете земји треба да соработуваат и да ги истражуваат меѓусебните можности за соработка“, рече канадската министерка Нг. „Индонезија и Канада имаат слична визија за оптимизација на природните ресурси за економска корист на одржлив начин“, додаде таа.
