Златото се искачи на петмесечен максимум

Златото се искачи на највисоко ценовно ниво од јули поради тоа што вредноста на доларот падна, а трговците „живнаа“, бидејќи Кина укина дел од ограничувањата од политиката на нулта ковид. Кинеските власти ги забрзаа работите кон повторно отворање на втората најголема економија во светот, при што Шангај и Хенгжу ублажија некои од ограничувањата по протестите што се одржаа против строгата национална политика.

Промптното злато утрово порасна за 0,6 проценти, на 1.808,64 долари за унца, а се тргува на највисоко ниво од почетокот на јули. Индексот на „Блумберг“ за вредноста на доларот падна за 0,4 проценти, што е најниско ниво од јуни. Паладиумот, среброто и платината исто така добија на вредност.

Златните прачки беа оштетени од агресивното зголемување на каматните стапки од страна на американските Федерални резерви (ФЕД) оваа година. Неодамнешните назнаки дека централната банка ќе стане помалку јастребовска го поттикнаа тргувањето со златото, искачувајќи го благородниот метал во текот на минатата недела на ниво од над 1.800 долари за унца. Иако на крајот од минатонеделното тргување цената на златото падна под тоа ниво поради извештајот за вработувањата во САД, сепак повторното отворање на Кина ја спушти вредноста на доларот, што, пак, дополнително го зајакна златото утрово.

Имено, златото има тенденција на негативна корелација со доларот и со каматните стапки, бидејќи не нуди камата, а цената му е изразена во американската валута.

„Силните податоци за работните места и притисоците врз платите во САД придонесоа да се намали вредноста на златото, но благородниот метал речиси веднаш порасна“, вели Николас Фрапел, глобален раководител на институционални пазари во рафинеријата ABC во Сиднеј.

 

Во моментов нема коментари за веста. Биди прв да коментира...

Остави коментар